На загарэлым твары выступаюць кропелькі поту. І тут міжволі ўспомнілася прыказка: працаваць да сёмага поту. Яна найлепш падыходзіць для працаўнікоў сяла. Такіх, з кім нам давялося нядаўна сустрэцца ў СВК “Калгас “Зара”. На полі, што за вёскай Баянава, сеялі кукурузу. І галоўнага героя гэтага працэсу прыйшлося крыху пачакаць, пакуль ён завершыць чарговы круг і з пустой сеялкай пад’едзе пад загрузку. Васіль Пінчук аказаўся шчырым, ветлівым чалавекам. Асабліва часу для размовы ў яго не было, таму фатаграфавалі і гутарылі з ім адначасова.
— Мне падабаецца тое, што раблю, — кажа Васіль Рыгоравіч. — Праца механізатара ў калгасе заўсёды запатрабаваная. Яшчэ нядаўна арганіку раскідваў, а цяпер вось на МТЗ-1221 з сеялкай СКП-12 сею кукурузу. Потым пойдуць іншыя работы. Вось так і працуем у бесперапынным калейдаскопе хлебаробскіх падзей.
Сапраўды, дзе тут расслабішся, калі планы гаспадаркі на кукурузу вялікія — 1350 гектараў, і значную частку з іх пасее Васіль Пінчук — механізатар са стажам, большым за 20 гадоў. І зробіць гэта абавязкова з уласцівай яму стараннасцю і якасна. Так падказвае яго сумленне, так навучыла яго жыццё.

Вольга ЧУЧВАЛ
Фота Сяргея РУДЗІНСКАГА