Глушчына адзначыла, адсвяткавала Дзень Перамогі. Адгрымеў салют, адгучалі песні, словы віншавання паважаным ветэранам. Сёння ў раёне пражываюць 22 інваліды і 26 удзельнікаў Вялікай Айчыннай вайны. На жаль, пражытыя гады і атрыманыя раны сказаліся на здароўі былых салдат і не ўсе з іх маглі ўдзельнічаць у святочных мерапрыемствах, што прайшлі ў раёне, але ўвагай з нагоды гэтага самага дарагога і памятнага для іх свята ніхто не быў абдзелены. Адных удзельнікаў вайны павіншавалі дома, іншыя прымалі віншаванні спачатку на плошчы гарадскога пасёлка, дзе збіраліся святочныя калоны ўдзельнікаў шэсця, а потым каля мемарыяла “Воінская Слава”, дзе прайшоў урачысты мітынг. 
Усё было, як і заўсёды, прыгожа, маляўніча, кранальна да слёз: месцамі — ад успамінаў пра загі-нуўшых, месцамі — ад замілавання самымі юнымі ўдзельнікамі свята. Яны выходзілі ў салдацкіх гімнасцёрках, у пілотках, спявалі, танцавалі, вяртаючы ў памяці ветэранаў карціны тых далёкіх гадоў, калі наш народ разам з усёй вялікай краінай паўстаў на абарону сваёй зямлі. «Мы добра ўсведамляем, — зазначыў, звяртаючыся да ветэранаў, жыхароў і гасцей горада, старшыня раённага выканаўчага камітэта Юрый Дымша, — якой дарагой цаной аплачана Перамога, таму 9 мая мы ўсім народам ушаноўваем жывых сведкаў тых далёкіх падзей і смуткуем пра тых, чыё жыццё забрала вайна. Нікому нельга забываць, што ў часы ваеннага ліхалецця загінуў кожны трэці наш суайчыннік». Таму была хвіліна маўчання і зброевы салют, былі кветкі былым салдатам Вялікай Айчыннай і іх унукам, салдатам Афганскай вайны, была шчырая падзяка тым, хто набліжаў Перамогу сваёй гераічнай працай у тыле ворага, і тым, хто потым узнімаў краіну з руін. 
Сапраўды, свята Перамогі аб’ядноўвае, збліжае ўсе пакаленні, і зусім не дзіўна, што на працягу 67 гадоў, якія прайшлі з дня 9 мая 1945 года, гэты дзень прадаўжае заставацца ў нашай краіне самым радасным, самым светлым і прыгожым. Вось і сяголета надвор’е падарыла нам цудоўны дзень, разышліся хмары, выглянула сонца, у небе кружылі буслы, сады радавалі маладой зелянінай і пышнай квеценню, што яшчэ больш павялі-чвала агульную радасць, узнімала настрой. Таму глушчане гулялі, весяліліся, адпачывалі, падтрымлівалі юных спартсменаў, слухалі святочны канцэрт. І гэтыя выступленні, і лёгкаатлетычны прабег, і масавае гулянне ў цэнтры гарадскога пасёлка 9 мая — усё праводзілася з нагоды свята Перамогі, у гонар Вялікай Перамогі і дзякуючы Перамозе 45-га года. У памяць пра яе і напярэдадні свята, 8 мая, паўсюдна на тэрыторыях сельсаветаў і ў Глуску прайшлі ўрачыстыя ўскладанні вянкоў і кветак да помнікаў і воінскіх пахаванняў, а таксама на Алеі Славы і памятнага знака воінам-інтэрнацыяналістам, бо ніхто і нішто з той вайны не павінна быць забыта і не будзе забыта.
Т.ЛУКАШЭВІЧ
