Пасведчанне Спецыяльнага фонда па падтрымцы таленавітай моладзі пры Прэзідэнце Рэспублікі Беларусь, а таксама падзячны ліст старшыні Глускага раённага выканаўчага камітэта вучаніцы 10 класа СШ №2 Таццяне Валадковіч на ўрачыстай школьнай лінейцы апошняга званка ўручыла намеснік старшыні раённага выканаўчага камітэта Людміла Клыга. Акрамя таго, па рашэнні раённага выканаўчага камітэта за перамогу ў абласной алімпіядзе па абслугоўваючай працы Таццяна ўзнагароджана прэміяй у памеры 15 базавых велічынь і 25 базавых велічынь — за 2 месца на рэспубліканскім этапе алімпіяды.
Зазначым, што вучаніца другой школы Таццяна Валадковіч другі год запар займае прызавыя месца на рэспубліканскай алімпіядзе. Год назад у яе было 3 месца, а гэты навучальны год прынёс дзяўчыне “серабро”. Разам з гэтым школьніца другі раз становіцца лаўрэатам спецыяльнай прэміі Прэзідэнта Рэспублікі Беларусь па падтрымцы таленавітай моладзі.
У гэты ж дзень, 30 мая, на свяце апошняга званка падзячны ліст старшыні Глускага раённага выканаўчага камітэта і прэмію райвыканкама ў памеры 3 базавых велічынь за заахвочвальны дыплом на абласной алімпіядзе па тэхнічнай працы вучню Бярозаўскага ВПК Дзмітрыю Лазовіку ўручыў начальнік аддзела адукацыі Аляксандр Бельскі. Нямала адораных вучняў ёсць і сярод выпускнікоў 2012 года, яны адпаведныя ўзнагароды райвыканкама за дасягненні ў вучобе, поспехі ў навуковых, творчых праектах і спорце атрымаюць падчас свайго апошняга школьнага балю.
Т.ЛУКАШЭВІЧ
Фота С.РУДЗІНСКАГА
На здымку: намеснік старшыні Глускага райвыканкама Людміла Клыга ўручае ўзнагароды і прэмію вучаніцы СШ №2 Таццяне Валадковіч
