Дзіцячы эстрадны праект “Суперартыст” Магілёўскай абласной філармоніі пабываў і ў Глуску. Пасля праслухоўвання членамі журы юных артыстаў на фінальнае выступленне была запрошана глушчанка Марыя Хлань. Дзяўчына вучыцца ў гімназіі (скончыла 10 класаў), любіць спяваць, аднак спецыяльных заняткаў па вакалу не наведвае. Тым не менш можна гаварыць пра яе несумненныя здольнасці, паколькі і ў Магілёве выступіла таксама ўдала і стала прызёрам праекта “Суперартыст”, заваяваўшы дыплом III ступені (I і II месцы ў бабруйчан). Больш таго, дзяўчыне прапанавалі займацца ў адной з творчых студый Бабруйска, а ад Магілёўскай абласной філармоніі Марыя атрымала запрашэнне прыняць удзел у новым музычным праекце — “Лесвіца ў неба”. Застаецца толькі парадавацца за юнае дараванне і пажадаць новых творчых дасягненняў.

Фота Сяргея РУДЗІНСКАГА На здымку: Марыя Хлань выступае на свяце, прысвечаным Дню дзяцей