Дзецям — марожанае, салодкая вата, поп-корн, батуты, цацкі з міргаючымі агеньчыкамі, дарослым — іншыя пачастункі ад мясцовых кулінараў і для ўсіх — цікавае прадстаўленне з вясёлай музычнай праграмай. Так у Глуску праходзіла старажытнае народнае свята Купалле. Даўно страчана вера ў чароўную папараць-кветку, што прыносіць шчасце і багацце, але гэта легенда застаецца адной з самых прыгожых, а свята — адно з найбольш любімых і шануемых у нашым народзе. Паколькі асноўныя сілы работнікаў мясцовага Дома культуры былі, так бы мовіць, адцягнуты на Александрыю, то свае самыя лепшыя творчыя здольнасці ў поўную сілу праявілі самадзейныя артысты — народны фальклорны гурт “Спадчына” і ансамбль народнай песні “Заранка” Хваставіцкага Дома культуры, асобныя аматары-выканаўцы Марыя Чарнікевіч, Руслан Рындзевіч, Дзмітрый Сокал. Усе разам яны і стварылі глушчанам сапраўдны святочны настрой, зрабілі іх вячэрні адпачынак цікавым і прыемным ва ўсіх адносінах. Былі і Купала з Купалінкай, кветкі, вяночкі і купальскія гаданні — дзяўчаты і пярсцёнкі з жыта цягнулі — ці багатым будзе жаніх, і фасолю з торбачкі жменяю бралі — у пары ці не ў пары будзе ў гэтым годзе, і венік праз плячо кідалі — з якога боку чакаць жаніха. Верылі яны ў гэтыя гаданні ці не, не будзем гадаць і мы, але тое, што гэта было ім цікава — відавочна. З цікавасцю і задавальненнем слухалі глушчане спевы ў жывым выкананні пад жывы гук, прыпеўкі, потымі сталі заказваць віншаванні сваім знаёмым, а тады і самі, і дарослыя, і дзеці, пусціліся ў скокі. Чула, як хтосьці з гасцей свята, мабыць, прыезджы, зазначыў свайму знаёмаму, што не думаў, што ў Глуску столькі людзей і столькі таленавітых выканаўцаў. А што ж, мы такія, мы яшчэ і не так можам. Напрыклад, у Завалочыцах таксама святкавалі Купалле, і таксама з песнямі, карагодамі і нават купальскім вогнішчам. І зноў жа — усё сваімі творчымі сіламі. Пры Завалочыцкім СДК даўно і плённа дзейнічае народны самадзейны калектыў, знайшліся і юныя танцоры-аматары, якія падтрымлівалі агульны святочны настрой і першымі былі ў карагодах. Задаволены засталіся і самі ўдзельнікі, і, безумоўна, гледачы свята. Не сумавалі купальскім вечарам і жыхары іншых аграгарадкоў — Бярозаўкі, Калацічаў, Каткі, Заеліцы, Засценка Усцярхі, дзе мясцовыя культработнікі таксама наладзілі гулянні, канцэрты, дыскатэкі, тэатралізаваныя прадстаўленні. І сапраўды, калі ёсць прыдатная нагода і магчымасць ды пры гэтым і надвор’е спрыяе — чаму ж не адпачыць, чаму не павесяліцца?!

Т.ЛУГАВАЯ
Фота І.ГРАМЫКІ
і А.ЛУК’ЯНЕЦ
На здымках: удзельнікі свята ў Глуску і Завалочыцах