За мінулыя выхадныя хлебаробы Глушчыны ўшчыльную наблізіліся да экватара жніва: па стану на 30 ліпеня зерневыя былі зжаты на плошчы ў 4256 га, што складае амаль 49 працэнтаў ад патрэбнага. Больш за палову пасеяных плошчаў убралі ўжо ў СВК “Калгас “Зара”, “Слаўгарадскі” і райаграпрамтэхзабеспячэнні, у той жа час у СВК “Дружба” зжалі пакуль 38 працэнтаў пасеяных зерневых культур. Валавы намалот збожжа па раёне набліжаецца да 13 тысяч тон пры сярэдняй ураджайнасці 30,5 цэнтнера на гектар. Найбольш урадлівыя нівы зараз у СВК “Калгас “Слаўгарадскі”, дзе збіраюць па 31,7 цэнтнера на круг, больш за 30 центнераў намалочваюць на кожным гектары ў саўгасе “Завалочыцы”, а замыкае раённую зводку жніва з паказчыкам 20,9ц/га СВК “Калгас “Зара камуны”.
Лідарамі жніва згодна з інфармацыяй раённага камітэта прафсаюза работнікаў аграпрамысловага комплексу па-ранейшаму застаюцца браты Дземідзенка са “Слаўгарадскага”, у якіх агульны намалот (разам з рапсам) перавышае ўжо паўтары тысячы тон. На другой пазіцыі з паказчыкам 930 тон намалочанага збожжа экіпаж Лазовіка і Янушэўскага з “Зары”. Трэцяе месца на жніве ўтрымлівае сямейны экіпаж Дзмітрыевых з эксперыментальнай базы “Глуск” — 677 тон зерня.
Сярод маладзёжных экіпажаў месцы па намалоту зерня (без уліку рапсу) размеркаваны наступным чынам: лідары спаборніцтва браты Філіпенка (547 тон), за імі Аляксандр Панкрацьеў і Ігар Дымша (483 тоны) — абодва экіпажы з СВК “Калгас “Слаўгарадскі”, на трэцім месцы Арцём Гурын і Дзмітрый Клыга з саўгаса “Завалочыцы” (385 тон збожжа).