Шчодрасць яблыневага саду

Сады сяголета радуюць сваіх гаспадароў шчодрым ураджаем яблыкаў. Вабяць вока наліўнымі бакамі белыя налівы, зялёна-жоўтыя папіраўкі, салодкія мірончыкі, ярка-жоўтыя кітайкі, выспяваюць да мядовага колеру і такога жа мядовага смаку цукеркавыя яблыкі, гнецца галлё ад антэяў і штрыфеляў. Вось ужо дзе раздолле для гаспадынь — вары варэнне, працірай на джэмы або закрывай у слоікі цалкам, сушы ў печы, цісні сок, пячы з імі пірагі, начыняй наліснікі, еж да адвалу, набівай аскоміну — і ўсё роўна не дасі ім рады: столькі ў гэтым годзе яблыкаў.
На руку такая шчодрасць садоў і нарыхтоўшчыкам. Глускаму спажывецкаму таварыству патрэбна нарыхтаваць у гэтым сезоне 760 тон яблыкаў. Як паведамілі нам у аддзеле нарыхтовак, іх ужо закуплена 642 тоны. Яблыкі прымаюць па 500 рублёў за кілаграм, іх закупкай займаюцца 5 нарыхтоўшчыкаў ад Глускага раённага спажывецкага таварыства. Пастаўляецца ўся гэта сакавітая сыравіна на перапрацоўчыя прадпрыемствы. У прыватнасці, на Пухавіцкі харчовы камбінат, у гандлёвы цэнтр Бабруйска, на Клімавіцкі лікёра-гарэлачны завод і Полацкі віназавод, а таксама харчавікам-перапрацоўшчыкам Любаншчыны.
Мясцовае насельніцтва сяголета вельмі актыўна здае яблыкі, не тое што летась. Па-першае, сам столькі не перапрацуеш і не спажывеш, дык чаго ж дабру прападаць? Па-другое, дадатковы даход нікому не пашкодзіць. Ёсць попыт, ёсць прапанова, наладжаны збыт, таму няма сумнення, што даведзенае заданне па нарыхтоўцы яблыкаў раённым спажывецкім таварыствам будзе выканана.