Турнір памяці воіна-інтэрнацыяналіста

Турнір па настольным тэнісе памяці воіна-інтэрнацыяналіста Рамана Тупіцы правялі фізкультурна-спартыўны клуб і раённая арганізацыя воінаў-інтэрнацыяналістаў. Спаборніцтвы праходзілі з 19 па 21 верасня і сабралі 30 удзельнікаў з Глуска і аграгарадка Засценак Усцярхі. Каманднага саперніцтва не праводзілася, кожны тэнісіст-аматар выступаў сам за сябе. У выніку сярод дзяўчат і жанчын вызначыліся 4 прызёры. Першае месца заваявала Крысціна Сярэбранікава, вучаніца гімназіі. На другім месцы апынуліся адразу дзве ўдзельніцы, якія набралі аднолькавую колькасць ачкоў, гэта вучаніца першай школы райцэнтра Дар’я Філіповіч і работніца лясгаса Святлана Нікітка. Трэці вынік у школьніцы з Усцярхоў Ірыны Лядзян. Сярод юнакоў і мужчын тройку лідараў складаюць вучань гімназіі Дзмітрый Каладзінскі, у яго першае месца. Другім стаў работнік “Рамбуда” Уладзімір Лугін, наступны за ім вынік у Дзмітрыя Шчэрбы з прадстаўніцтва “Дзяржстраха”. Пераможцаў і прызёраў турніру павіншаваў і ўзнагародзіў Дыпломамі і грашовымі прэміямі старшыня раённай арганізацыі воінаў-інтэрнацыяналістаў Аляксандр Тычына.