Стары будынак пад новым дахам
Так, стары будынак пад новым дахам — гэта пра аптэку. Пра нашу местачковую аптэку, у сценах якой гандлявалі лекамі больш за сто год. Будуць гандляваць і далей, але ўжо ў значна больш зручных умовах, чым гэта было раней. Да таго, як Магілёўскае РУП “Фармацыя” вырашыла правесці такую патрэбную будынку рэканструкцыю. Гэта важная справа даручана таварыству з дадатковай адказнасцю “Белбудпарытэт”, работы пачаліся вясной, вяліся ўсё лета, прадаўжаюцца і зараз. Прычым ужо і ўнутры памяшкання. Знадворку, і гэта бачна, што называецца, няўзброеным вокам, праведзена ўцяпленне будынка, з’явіўся новы прыгожы дах з маталачарапіцы. Зроблена новае электразабеспячэнне (згодна з сучаснымі патрабаваннямі яно пракладзена пад зямлёй, замест ранейшых паветраных ліній), пракладзена новая цеплатраса для падключэння да цэнтральнага ацяплення. Унутры памяшкання з’явіліся санітарныя пакоі разам з іншымі зручнасцямі. Прыгожая плітка на падлозе, нацяжная столь, электраправодка, батарэі ацяплення — усё гэта ўжо зроблена будаўні-чымі брыгадамі, што працуюць на аб’екце. Тэрмін яго здачы, праўда, перанесены, але ненадоўга. Справа за некаторымі відамі аддзелачных работ, унутры і звонку, а таксама, як будзе праверана работа цеплатрасы, за добраўпарадкаваннем тэрыторыі. Так што хутка абноўленая аптэка зноў пачне прымаць сваіх кліентаў-пакупнікоў на старым, такім звыклым для іх месцы, па Пушкінскай, 6. А сам будынак па-ранейшаму будзе заставацца прыкметным і знакавым у цэнтры нашага мястэчка для яго жыхароў.
Т.ЛУГАВАЯ