Вось і ў нашым Глуску, як у вялікім горадзе, нарэшце з’явіўся каток у самым зручным для яго наведвання месцы. Праўда, наконт гэтай зручнасці было, ды і зараз яшчэ не ўлеглася, нямала спрэчак: маўляў, прахожым слізка хадзіць. Ну ды праз каток да кінатэатра хадзіць і не трэба, а што да тратуара, то яго ўжо расчысцілі – ідзі сабе, калі ласка. Праўда, некаторае абледзяненне з дарожак пакуль не збілі, але саб’юць, абавязкова саб’юць. І тады кожны атрымае сваё: моладзь і ўсе, хто можа стаяць на каньках, – месца для катання, людзі больш паважанага веку – бяспечныя ўмовы (дарэчы, паслізнуцца можа хто заўгодна і дзе заўгодна). Няўжо не можа быць, каб усім было добра?! Павінна быць, хутка ж Новы год!