Да юбілею вобласці

У гэтыя дні ў Глускім раёне праходзяць мерапрыемствы, прысвечаныя 75-й гадавіне ўтварэння Магілёўскай вобласці. У навучальных установах раёна праводзяцца тэматычныя класныя гадзіны, гутаркі, завочныя падарожжы, з тым, каб дзеці маглі даведацца як мага больш пра гісторыю нашага Прыдняпроўскага краю, пра яго слаўнае мінулае і дзень сённяшні. На гэта ж нацэлены падборкі літаратуры і фотавыставы, што падрыхтаваны ў бібліятэках раёна для іх наведвальнікаў, каб кожны, хто жадае, мог не толькі паглядзець, але і знайсці, пачытаць патрэбную яму інфармацыю. Да гэтых мерапрыемстваў далучаюцца і клубныя ўстановы раёна, у прыватнасці, у кінатэатры “Арыён” на працягу ўсяго гэтага месяца праходзіць абласная кінаакцыя “Кіно маёй краіны”, у рамках якой дэманструюцца новыя дакументальныя і мастацкія фільмы. Адпаведная тэматычная рубрыка, прысвечаная ўтварэнню вобласці, з’явілася і на старонках раённай газеты “Радзіма”.