Калектыў Глускага раённага спажывецкага таварыства заняў першае месца ў галіне “грамадскае харчаванне” сярод раённых спажывецкіх таварыстваў Магілёўскай вобласці па выніках фінансава-гаспадарчай дзейнасці за 2012 год. Ганаровая грамата з адпаведным запісам была ўручана старшыні праўлення Глускага райпо Сяргею Зубчонку падчас правядзення справаздачнага сходу ўпаўнаважаных Магілёўскага аблспажыўсаюза.
І сапраўды, за мінулы год прадпрыемствамі грамадскага харчавання план тавараабароту выкананы на 104,1% пры прагнозным паказчыку 102. Чысты прыбытак склаў 232 мільёны рублёў, а ўласнай прадукцыі было выпушчана больш як на 6 мільярдаў рублёў. У сярэднім на аднаго чалавека прадукцыі ўласнай вытворчасці было рэалізавана на 573 тысячы рублёў, а гэта больш, чым у сярэднім па вобласці.
Дарэчы, добра мясцовыя харчавікі пачалі і гэты год, па словах начальніка ўчастка грамадскага харчавання Тамары Самуйлік, за студзень — сакавік рознічны тавараабарот па сістэме грамадскага харчавання склаў 113,7 працэнта пры запланаваных 109 працэнтах. У мінулым годзе была адкрыта бутэрбродная ў аграгарадку Засценак Усцярхі і аднавіла сваю дзейнасць кафэ ў гандлёвым цэнтры “Рабінушка”, што ў Заеліцы. Абнаўленне і ўдасканаленне матэрыяльнай базы прадаўжаецца і зараз. Так, у кафэ “Маладосць” ідзе рамонт вытворчых памяшканняў, там жа з’явіцца цэх па выпуску кандытарскіх вырабаў, іх, што называецца, з пылу, з жару будуць прапаноўваць наведвальнікам самога кафэ і прадаваць у магазіне “Кулінарыя”. Не застанецца без аб’екта грамадскага харчавання і новы мікрараён каля першай школы — ён з’явіцца ў адным памяшканні з магазінам “Спутник”. Усяго ж у нашым раёне кліентаў абслугоўваюць 18 аб’ектаў грамадскага харчавання на 356 пасадачных месцаў, 7 з іх знаходзяцца ў сельскай мясцовасці. У сістэме працуюць 35 чалавек, менавіта іх стараннямі, іх адказнымі адносінамі да справы і дасягнуты такі добры вынік. У гэтым пераканана начальнік участка грамадскага харчавання Тамара Самуйлік. У праўленні райпо гэтага не аспрэчваюць, але галоўную заслугу ў высокіх паказчыках бачаць у намаганнях самой Тамары Платонаўны — чалавека, які да драбніц ведае ўсю сістэму грамадскага харчавання і на працягу многіх гадоў самааддана служыць сваёй справе. Хто ведае гэтага спецыяліста, пагодзіцца з такім меркаваннем.
— Мы ўсе працуем на агульны вынік, — завяршае нашу размову Тамара Платонаўна, — адкрываем новыя кропкі, распрацоўваем новыя стравы, павышаем якасць абслугоўвання, каб нашы кліенты заставаліся задаволенымі нашай работай і прыходзілі да нас зноў і зноў.

Т.ЛУКАШЭВІЧ