Чатыры ўзгаранні за два дні
Чатыры выезды па трывожных сігналах здзейснілі ратавальныя разлікі раённага аддзела па надзвычайных сітуацыях за мінулыя выхадныя. На шчасце, узгаранні былі выяўлены на пачатковых стадыях, пажарныя разлікі, як і заўсёды, спрацавалі аператыўна і колькі-небудзь значнага матэрыяльнага ўрону агонь на гэты раз не прынёс. Узгаранні адбыліся: у аграгарадку Клетнае па прычыне кароткага замыкання электраправодкі; у Глуску два выпадкі па адной прычыне — спальванне смецця (вось і дазволь яго спальваць), агонь выйшаў з-пад кантролю, пажару не адбылося, але справа закончылася штрафам; у аграгарадку Калацічы з-за неасцярожнага абыходжання з агнём пры курэнні пачала дыміцца коўдра, пажарны апавяшчальнік у доме быў, але ў няспраўным стане, задымленне ўбачылі самі гаспадары і выклікалі ратаўнікоў. Ва ўсіх выпадках, як пракаменціравалі сітуацыю ў раённым аддзеле па надзвычайных сітуацыях, прычынай узгаранняў стаў славуты чалавечы фактар.