Ці заўсёды пры пакупцы таго ці іншага харчовага тавару вы звяртаеце ўвагу на тэрмін яго прыдатнасці? Калі не заўсёды, то дарэмна. І не толькі таму, што ваша ўласная ўважлівасць дапаможа пазбегнуць непрыемнасцяў у выглядзе пратэрмінаванага прадукту з усімі выцякаючымі наступствамі. А яшчэ і па той простай прычыне, што, знайшоўшы такі прадукт у магазіне, вы можаце атрымаць такое ж яго найменне, але добрай якасці і ўжо бясплатна. Гэта называецца сістэмай спажывецкага кантролю. На пачатку гэтага года яна была ўведзена ў магазіне “Глушчанка” ў якасці эксперымента. Ці сталі людзі больш уважліва прыглядацца да этыкетак і цэннікаў? Так, прыкмячаюць прадаўцы “Глушчанкі”, сталі. А ці знайшоў за гэтыя месяцы хто-небудзь з пакупнікоў тут пратэрмінаваныя прадукты? Не, не знайшоў. “Ну вось, — скажа расчараваны спажывец, — дарэмна гэты кантроль уводзілі: нікому не пашанцавала атрымаць бясплатны тавар!” З аднаго боку яно і сапраўды так, але ж сэнс спажывецкага кантролю якраз у тым, каб не дапусціць на паліцах нашых магазінаў з’яўлення непрыдатных для ўжывання харчовых тавараў. А вось з гэтай сваёй задачай сістэма спажывецкага кантролю якраз і справілася, бо, разумеючы, што за бясплатныя для пакупнікоў тавары плаціць давядзецца прадаўцам, яны самі са свайго боку ўзмацнілі кантроль за тэрмінам прыгоднасці прадуктаў. Як вынік — пратэрміноўкі ў “Глушчанцы” ў гэтым годзе не знайшлі не толькі спажыўцы, але і правяраючыя службы, якія, як вядома, не абыходзяць сваёй увагай магазіны, асабліва прадуктовыя.
— На жаль, нам пакуль не ўдаецца поўнасцю пазбегнуць з’яўлення пратэрмінаваных прадуктаў у нашых гандлёвых кропках, — гаворыць намеснік старшыні раённага спажывецкага таварыства Наталля Талкачова, — толькі ў гэтым годзе такія факты былі выяўлены ў пяці магазінах. Вось чаму сістэма спажывецкага катролю за тэрмінам прыгоднасці тавараў была ўведзена спачатку ва ўніверсаме “Глушчанка”, а зараз прынята рашэнне, адпаведна якому з 18 красавіка яна пачала дзейнічаць ва ўсіх прадуктовых магазінах Глускага райпо, як у гарадскім пасёлку, так і ў сельскай мясцовасці. Так што, паважаныя пакупнікі, калі вы знойдзеце пратэрмінаваны тавар, вам яго павінны замяніць на такі ж, толькі якасны, ды яшчэ і даць яго бясплатна. Гэта, несумненна, прастымулюе ўсіх прадаўцоў быць больш уважлівымі і своечасова здымаць з продажу прадукты з сышоўшым тэрмінам прыдатнасці.

Т. ЛУКАШЭВІЧ
Фота С. РУДЗІНСКАГА