Добры гаспадар свае крокі заўсёды пралічвае наперад. Напрыклад, як зрабіць так, каб і справа хутчэй ладзілася, і спецыялісты былі задаволены, і гаспадарка пры гэтым не панесла вялікія затраты? У СВК “Калгас “Зара” рашэнне было знойдзена даволі хутка: закупіць намеснікам старшыні скутары. Не вагаліся доўга, асвойваючы новую для сябе тэхніку, і самі спецыялісты. Да прыкладу, намеснік па жывёлагадоўлі Таццяна Залынская, нягледзячы на тое, што тады была ўжо ў перадпенсійным узросце, даволі хутка асвоіла мота-транспарт і яшчэ хутчэй адчула ад яго выгаду. Дзіва што: ёй за дзень патрэбна бывае наведаць і жывёлагадоўчы комплекс у Пцічы, і фермы ў Бярозаўцы і Зелянковічах — дык хіба ж на веласіпедзе праедзеш такую адлегласць? А не, дык чакай, пакуль на машыне хто падкіне. Тут жа сам сабе гаспадар: патрэбна — сеў ды паехаў. За дзень, гаворыць Таццяна Пятроўна, кіламетраў па 90 наматвае, і пры гэтым паліва няшмат выкарыстоўваецца.
Тое самае сказала і памочнік галоўнага агранома Ніна Грабко. Яе маршруты — палеткі гаспадаркі, пяты год яна аб’язджае іх на скутары (за дзень да 100 кіламетраў) і цяпер ужо нават не разумее, як раней абыходзілася без яго, гэта ж так зручна, добра, хутка і, зноў жа, ні ад кога не залежыш, едзеш куды табе патрэбна па тваіх паляводчых справах і калі патрэбна.
Хутка перамяшчацца, быць заўсёды ў курсе, усё праверыць і пабачыць на свае вочы дапамагае набытая гаспадаркай мотатэх-ніка таксама і намесніку старшыні СВК па будаўніцтве Віктару Чабанюку. Участак, за які ён адказвае, няпросты, часам неспакойны і таму патрабуе пастаяннай і пільнай увагі, вось чаму Віктара Пятровіча за даволі кароткі час можна пабачыць у некалькіх розных месцах. Дапамагае пераадольваць адлегласць зноў жа выдзелены яму кіраўніцтвам гаспадаркі скутар. Вось толькі хуткасці бывае малавата, наракае галоўны будаўнік гаспадаркі, — 90 кіламетраў за гадзіну. Аднак цішэй едзеш, заўважым мы, — больш пабачыш. А ў будаўнічай справе гэта не менш важна, чым хуткасць. Разумее гэта і сам Віктар Чабанюк, таму тэхнікай сваёй у цэлым задаволены і лічыць “скутарызацыю” спецыялістаў гаспадаркі правільным крокам. Асабліва актуальны ён зараз, калі эканомія паліўных рэсурсаў выходзіць на адно з першых месцаў у гаспадаранні, а клопат пра людзей быў заўсёды важным для дбайных і прадбачлівых гаспадароў.

Т. ЛУКАШЭВІЧ
Фота С. РУДЗІНСКАГА