Глускі сельскагаспадарчы вытворчы кааператыў “Калгас “Зара” стаў першым афіцыйным месцам работы для васьмі юнакоў — навучэнцаў Бабруйскага электратэхнічнага каледжа. І няхай сабе гэта было толькі часовае працаўладкаванне, на тэрмін  працоўнай змены іх студэнцкага атрада, аднак гэты факт было вырашана не пакідаць без увагі і ўручыць маладым людзям іх працоўныя кніжкі ва ўрачыстай абстаноўцы. Гэта і зрабілі намеснік старшыні калгаса па ідэалагічнай рабоце Наталля Акуліч з інспектарам па кадрах Таісіяй Салавей і намеснікам дырэктара каледжа па выхаваўчай рабоце Жаннай Долгай. Пры гэтым абодва бакі падзяліліся ўражаннямі ад супрацоўніцтва, а найбольш актыўныя навучэнцы атрымалі яшчэ і граматы за ўдзел у жыцці гаспадаркі.

— Нашы ўхвальныя водгукі адзін пра аднаго — гэта не проста ўзаемаветлівыя крокі, — гаворыць Наталля Акуліч, — гэта крокі да трывалага і доўгатэрміновага супрацоўніцтва ў будучым. Скажам, мы яшчэ летам дамовіліся, што пры патрэбе навучэнцы каледжа дапамогуць гаспадарцы і восенню ва ўборцы ўраджаю. Не сумняваемся, што так і будзе. А на развітанне яны падарылі нам прыгожую і вельмі арыгінальную падстаўку для кветак, зробленую, між іншым, сваімі рукамі. Здаецца, дробязны штрых, але насамрэч ён гаворыць пра многае.

Т. ЛУКАШЭВІЧ

Фота В. ЧУЧВАЛ