Перамога над сабой і асаблівасцямі развіцця

Абласная спартакіяда сярод дамоў-інтэрнатаў Магілёўскай вобласці адбылася на мінулым тыдні на базе Веснаўскага  дома-інтэрната. Такія маштабныя спартыўныя спаборніцтвы з удзелам людзей з асаблівасцямі развіцця праводзяцца ў вобласці другі раз. Месцам іх правядзення Веснава было абрана невыпадкова, зазначыў у сваёй прывітальнай прамове намеснік старшыні камітэта па працы, занятасці і сацыяльнай абароне Магілёўскага аблвыканкама Мікалай Казакоў. Многія з тых, хто зараз жыве ў дамах-інтэрнатах для дарослых, пераехалі туды менавіта адсюль, з Веснава, тут засталіся іх сябры дзяцінства, тут усё знаёма ім. Не апошнюю ролю ў выбары месца правядзення спартакіяды адыграла і цудоўная спартыўная база, створаная ў гэтай установе.

У спаборніцтвах прынялі ўдзел каля ста чалавек з  дзевяці каманд, якія прыехалі з Салтанаўкі, Быхава, Каменкі, Крычава, Хоцімска, Расты, Бялыніч і Чавусаў. Вітаючы іх на глускай зямлі, намеснік старшыні райвыканкама Людміла Клыга адзначыла, што гэтыя спаборніцтвы, без сумнення, стануць яркай падзеяй у спартыўным жыцці раёна. І хоць перамога дастанецца сапраўды мацнейшым, але прайграўшых тут не будзе, бо заняткі фізкультурай і спортам спрыяюць не толькі здароўю чалавека, але і загартоўваюць яго характар.

У справядлівасці гэтых слоў можна было пераканацца ўжо на першым этапе спаборніцтваў — у выступленнях па лёгкай атлетыцы: бачна было, як стараюцца бегуны на дыстанцыях, як імкнуцца не адставаць і паказаць усё, на што здольныя. З не меншым азартам ішла барацьба на футбольным полі, дзе праходзілі спаборніцтвы па міні-футболе, адчувалася, што далёка не навічкі трымаюць у руках ракеткі для настольнага тэніса, сядзяць за шашачнымі дошкамі. Стараліся насамрэч усе, таму і перамога ў спаборніцтвах дасталася нялёгка, а ад таго яна яшчэ больш жаданая. Так, веснаўскія хлопцы і дзяўчаты двойчы станавіліся пераможцамі: яны былі самымі хуткімі на бегавых дарожках і лепш за іншых выступілі на спаборніцтвах па настольным тэнісе. На міні-футболе перамога была за прадстаўнікамі Салтанаўскага дома-інтэрната, на шашках — за Расцянскім домам-інтэрнатам.

У выніку і агульнае каманднае першае месца ў абласной спартакіядзе “Спорт для ўсіх” заслужана дасталася Веснаўскаму дому-інтэрнату для дзяцей з асаблівасцямі псіхафізічнага развіцця. На другім Каменскі дом-інтэрнат, дарэчы, яго прадстаўнікі па суме ўсіх выступленняў набралі аднолькавую колькасць балаў з веснаўчанамі, але саступілі па колькасці перамог. “Бронза” дасталася Салтанаўскаму дому-інтэрнату. А вось граматы і падарункі як за прызавыя месцы, так і за волю да перамогі атрымалі ўсе ўдзельнікі гэтых асаблівых спаборніцтваў, так вырашылі іх арганізатары — камітэт па працы, занятасці і сацыяльнай абароне Магілёўскага аблвыканкама, абласное ўпраўленне спорту і турызму. І вырашылі правільна, бо для тых, хто выходзіў на бегавыя дарожкі, на футбольнае поле, браў у рукі тэнісныя ракеткі і гуляў у шашкі, ужо адно гэта дзеянне само па сабе з’яўляецца перамогай над сабой, над узростам, над асаблівасцямі развіцця і іх жыцця ўвогуле.

А ў тым, што такія масавыя спаборніцтвы прайшлі арганізавана, аператыўна і нават весела, — несумненная заслуга прымаючага боку: Веснаўскага дома-інтэрната, аддзела адукацыі, спорту і турызму, аддзела ідэалагічнай работы, культуры і па справах моладзі на чале з Глускім раённым выканаўчым камітэтам.

Таццяна ЛУКАШЭВІЧ

Фота Сяргея РУДЗІНСКАГА