У Глускім раёне прайшоў конкурс сярод аператараў машыннага даення
Кажуць, што назіраць за тым, як працуюць іншыя, можна бясконца. Калі ж працуе не проста работнік, а высокі прафесіянал, то атрымаеш сапраўднае задавальненне. Нават калі гэта такая нерамантычная і не вельмі эстэтычная справа, як даенне каровы. На такой думцы злавіла сябе, калі назірала за ўдзельніцамі раённага конкурсу сярод аператараў машыннага даення, які праходзіў 8 лістапада на базе малочна-таварнай фермы Турыно СВК “Дружба”. Зразумела, што гаспадаркі дэлегіравалі лепшых сваіх даярак, але і сярод іх трэба было выбраць самых дастойных. Такая нялёгкая задача стаяла перад намеснікам начальніка ўпраўлення сельскай гаспадаркі і харчавання райвыканкама па жывёлагадоўлі Генадзем Казюкам (ён узначальваў журы), старшынёй райкама прафсаюза работнікаў аграпрамысловага комплексу Віталем Рагалевічам, заатэхнікам-селекцыянерам упраўлення сельскай гаспадаркі і харчавання Аленай Кузьміной і майстрам вытворчага навучання вучэбна-вытворчага камбіната Мікалаем Ляўшэвічам.
Аднак якая ні складаная задача ў журы, а самім канкурсанткам было ў разы цяжэй. Мяркуйце самі: усяго адна хвіліна даецца на тое, каб пазнаёміцца з каровай, так бы мовіць, устанавіць з ёю кантакт, пасля чаго можна падключаць апарат і прыступаць да даення. Зрэшты, як мяркуюць вопытныя даяркі, для таго, хто ў сваёй справе не навічок, хвіліны дастаткова, каб зразумець, што за жывёліна перад табой, які ў яе нораў. І падыходзілі, і разумелі, і даілі, праўда, працуючым на ферме даяркам не забаранялася падказваць, з якога боку прывыкла даіцца тая ці іншая жывёліна. Усё астатняе — справа рук і вопыту саміх канкурсантак. І хоць спецыялісты ўпраўлення яшчэ раз нагадалі ўдзельніцам асноўныя моманты, на якія абавязкова трэба звярнуць увагу, асабліва ў плане тэхнікі бяспекі, усё ж пры выкананні задання некаторыя рабілі так, як прывыклі, часам не зважаючы на правілы. За гэта, зразумела, заліковыя балы зніжаліся. Свае патрабаванні і пры разборцы і зборцы даільнага апарата. За парушэнне парадку дзеянняў і прамаруджванне таксама знімаліся балы, як і за няправільныя або няпоўныя адказы на тэарэтычнай частцы. І тым прыемней сказаць, што максімальны вынік быў дасягнуты: 75 балаў з 75 магчымых на раённым конкурсе аператараў машыннага даення набрала аператар СВК “Калгас “Зара” Ніна Шумская. Было прыемна глядзець, як яна выконвала ўсе заданні — ці то ў пакоі для адпачынку з апаратам, ці то працэс дойкі ў хляве. Яна працуе так, што нават неспецыялісту зразумела: перад намі майстар-прафесіянал, за якім шматгадовы вопыт, веды і ўменні. За гэта — і першае месца, і падарунак ад райкама прафсаюза. На другім месцы аператар машыннага даення з СВК “Калгас “Слаўгарадскі” Ірына Кавалёва, на трэцім — Таццяна Цімашэнка таксама з “Зары”. Заахвочвальны падарунак, а з ім і права разам з прызёрамі выступаць на абласным конкурсе аператараў машыннага даення атрымала маладая даярка з райаграпрамтэхзабеспячэння Анастасія Фядосава. Дарэчы, вусную падзяку і ўхвальныя водгукі ад арганізатараў атрымалі ўсе ўдзельніцы конкурсу, бо яны таксама паказалі добрае валоданне сваёй прафесіяй, вылучыліся ў тым або іншым заданні. Гэта Вольга Патапенка са “Слаўгарадскага”, Валянціна Пуцята, Алена Матулевіч і Вольга Дзядзюля з эксперыментальнай базы “Глуск”, Любоў Скіндзер і Аксана Гулевіч з СВК “Калгас “Зара камуны”, Кацярына Багдановіч з райаграпрамтэхзабеспячэння, Юлія Арлова і Ганна Малаткова з саўгаса “Завалочыцы”. Для ўсіх іх той конкурсны дзень стаў адметным, бо, хоць і давялося крыху пахвалявацца, але ж і парадавацца нагода была — за сябе, за іншых, за сваю справу, у якой працуюць такія спрытныя майстры, такія мілыя жанчыны.
Таццяна ЛУКАШЭВІЧ
