Стан і меры ўдасканалення работы прафкамаў і гаспадарчых арганізацый аграпрамысловага комплексу раёна па выкананні патрабаванняў аховы працы, стварэнні належных умоў працы разглядаліся на мінулым тыдні падчас правядзення пленума Глускай раённай арганізацыі прафсаюза работнікаў аграпрамысловага комплексу. У рабоце пленума прынялі ўдзел старшыня Магілёўскага гаркама прафсаюза работнікаў АПК Валерый Булановіч, кіраўнік справамі райвыканкама Наталія Савасцюк, галоўны дзяржінспектар па ахове працы і тэхніцы бяспекі сельгасупраўлення райвыканкама Анатоль Ёшчык. Аўдыторыю складалі старшыні прафкамаў, інжынеры па ахове працы, намеснікі па ідэалагічнай рабоце, начальнікі аддзелаў кадраў мясцовых гаспадарак і будаўнічых арганізацый раёна.
Ад таго, наколькі канструктыўна наладжаны дыялог паміж прафсаюзам і наймальнікам, залежыць стабільнасць работы і дынаміка развіцця прадпрыемства. Сваю дадатковую місію, па словах старшыні райкама прафсаюза работнікаў АПК Віталя Рагале-віча, райкам прафсаюза бачыць у маральнай падтрымцы работнікаў галіны, у пошуках новых шляхоў стымулявання працы і, безумоўна, у стварэнні яе бяспечных умоў. Скажам, для прафілактыкі вытворчага траўматызму і аказання практычнай дапамогі па выкананні правілаў аховы працы дзейнічаюць тры мабільныя групы. Падчас іх выездаў на месцы парушэнні правілаў бяспекі былі выяўлены як у сельскагаспадарчых, так і ў будаўнічых арганізацыях, самыя распаўсюджаныя сярод іх — гэта неправядзенне інструктажоў па ахове працы і работа без спецвопраткі і спецабутку. Для выпраўлення сітуацыі і аказання метадычнай дапамогі праводзіліся месячнікі бяспекі, а ў красавіку гэтага года на базе “Рамбуда” прайшоў семінар па ахове працы, куды разам з кіраўнікамі і спецыялістамі былі запрошаны і прадстаўнікі ўсіх прафкамаў раёна. Важным момантам у сваёй рабоце раённы камітэт прафсаюза бачыць таксама стымуляванне працы, узнагароджанне лепшых работнікаў, дзейнасць у гэтым накірунку была красамоўна праілюстравана фотапрэзентацыяй — прафсаюзныя лідары з працаўнікамі на палях, машынных дварах, зернетаках, у працоўных калектывах будаўнічых арганізацый, а яшчэ спорт, адпачынак, быт на вытворчасці, новыя аб’екты — словам, усё, што сведчыць: работа вядзецца, людзі жывуць, працуюць.
Вельмі паказальным у плане работы па тэхніцы бяспекі, вядзення ўсёй неабходнай дакументацыі з’яўляецца вопыт Глускай ПМК-249, таму многіх спецыялістаў зацікавіла выступленне на пленуме інжынера па ахове працы гэтай арганізацыі Анатоля Баяркі. Надзвычай важна, лічыць старшыня прафкама эксперыментальнай базы “Глуск” Вольга Насановіч, прафсаюзнаму камітэту і кіраўніцтву знайсці разуменне і выпрацаваць адзіныя падыходы ў рабоце, як у патрабавальнасці да дысцыпліны і тэхнікі бяспекі, так і ў метадах і формах заахвочвання лепшых. Вялікая ўвага пытанням аховы працы надаецца і ў Глускай ПМК-86 “Водбуд”. Як зазначыў падчас свайго выступлення старшыня прафсаюзнага камітэта арганізацыі Аляксандр Шклярэвіч, неабходныя інструкцыі, плакаты і іншая нагляднасць знаходзяцца заўсёды на віду, усе пункты калектыўнага дагавору выконваюцца. Са станоўчага боку работу па ахове працы ў мясцовай ПМК-249 адзначыў галоўны спецыяліст па ахове працы сельгасупраўлення Анатоль Ёшчык: “Адчуваецца высокі прафесійны ўзровень і ў вядзенні дакументацыі, і ў пастаноўцы работы з людзьмі”.
І гэта вельмі правільна, так павінна быць паўсюдна, бо ад выканання тэхнікі бяспекі напрамую залежыць узровень вытворчага траўматызму, а разам з ім жыццё і здароўе работнікаў, сказаў, падводзячы вынікі выступленняў, старшыня Магілёўскага гаркама прафсаюза работнікаў АПК Валерый Булановіч. У цэлым жа, лічыць ён, тэма пленума раскрыта, галоўнае цяпер — настроіцца на вырашэнне названых праблем і прадаўжаць мэтанакіраваную работу па абароне сацыяльна-эканамічных правоў работнікаў.
Т. ЛУКАШЭВІЧ
