Прыгажосць сваімі рукамі
Лепш гэтую выставу і не назавеш — “Свет фантазіі і прыгажосці”. Адкрылася яна ў Глускім раённым краязнаўчым музеі і складаецца з лепшых работ гурткоўцаў мясцовага Цэнтра творчасці. Усяго выстаўлена больш за 100 экспанатаў, выкананых у самых розных тэхніках. Тут і бацік, і мяккая цацка, і аб’ёмныя рэчы часам з самых нечаканых матэрыялаў (ад кафейных зярнят да стружачак з алоўка). Ёсць там казачная птушка, незвычайныя дрэвы, адмысловыя кветкі, навагоднія кампазіцыі, шыкоўны падсвечнік — усяго не пералічыш і тым больш не апішаш, таму лепш наведаць гэту выставу. Прычым зрабіць гэта найперш раім дарослым: паглядзіце, што ўмеюць нашы дзеці, якім бачаць або хочуць бачыць наш свет — прыгожым і незвычайным. Пры гэтым яны сваімі рукамі ствараюць гэтую самую незвычайную прыгажосць. Заходзьце, выстава працуе да 5 студзеня.