Чарговае пасяджэнне прэзідыума раённага савета ветэранаў прайшло зладжана і аператыўна. Гэта абумоўлена, мабыць, тым фактам, што старшыня Глускай раённай ветэранскай арганізацыі Валерый Сураўнёў — у мінулым чалавек ваенны, таму ўсё прывык выконваць хутка і дакладна. Вось і ў парадку дня пасяджэння значыліся толькі два, але важныя і дарэчныя менавіта зараз пытанні: справаздача старшыні раённага савета ветэранаў аб выкананні асноўных мерапрыемстваў на 2013 год і падвядзенне вынікаў раённага агляду-конкурсу на лепшую пярвічную ветэранскую арганізацыю.
Няма патрэбы зараз падрабязна апісваць усе мерапрыемствы і акцыі, якія праводзіліся на працягу года па ініцыятыве і пры ўдзеле раённага савета ветэранаў, таму што яны ніколі не выпадалі з поля зроку нашай рэдакцыі і падрабязна асвятляліся на старонках газеты і на раённым радыё. Дастаткова сказаць, што вялікая ўвага надавалася сацыяльнай абароне ветэранаў, асабліва адзінокіх і адзінока пражываючых, рабоце з дапрызыўнай і прызыўнай моладдзю, якая праводзіцца ў пярвічных арганізацыях, — гэтыя пытанні разглядаліся на пасяджэннях прэзідыума. Наладжана цеснае супрацоўніцтва з Цэнтрам сацыяльнага абслугоўвання насельніцтва, а выезды ў сельскія населеныя пункты ў складзе інфармацыйных груп дазваляюць дайсці да ўсіх ветэранаў, ведаць іх праблемы і патрэбы з тым, каб дапамагаць у іх вырашэнні. У гэтым накірунку варта прадаўжаць работу і ў наступным годзе, таксама як і ўручаць знакі “Ганаровы ветэран” — як падзяку і як стымул для ветэранскага актыву.
А пра тое, што ветэраны і насамрэч людзі актыўныя, сведчаць вынікі раённага агляду-конкурсу на лепшую пярвічную арганізацыю. Свае справаздачы прадставілі больш за 20 пярвічак, а пераможцы вызначаліся асобна сярод арганізацый з колькасцю да 100 чалавек і звыш 100 чалавек. Пасля дэталёвага разгляду дасланых матэрыялаў было вырашана ў першай групе прысудзіць два трэція месцы — ветэранскім арганізацыям гімназіі Глуска (старшыня Наталля Ігараўна Юрэвіч) і ПМК-249 (старшыня Галіна Іванаўна Жалудковіч), на другім месцы санаторная школа (старшыня ветэранскай арганізацыі Ніна Андрэеўна Кірынская), а першае месца прысуджана пярвічнай арганізацыі СШ № 2 (старшыня Паліна Юр’еўна Сандамірская). Сярод ветэранскіх арганізацый з колькасцю больш за 100 чалавек трэцяе месца вырашана не прысуджаць, а вось на першым месцы адразу дзве пярвічкі: УКП “Жылкамгас” (старшыня Любоў Паўлаўна Слонкіна) і Глускага райпо (старшыня Анастасія Мартынаўна Лісіца), другое — за СВК “Калгас “Зара” (старшыня ветэранскай арганізацыі Тамара Аляксандраўна Кудрэйка). Узнагароды пераможцам і прызёрам агляду-конкурсу ўручыў старшыня раённага Савета дэпутатаў Андрэй Баброўнік, не засталіся без матэрыяльнага заахвочвання і старшыні тых пярвічных ветэранскіх арганізацый, якія прынялі ўдзел у конкурсе на лепшую пярвічку. Ад імя ўзнагароджаных выступіла старшыня ветэранскай арганізацыі “Жылкамгаса” Любоў Слонкіна, яна падзякавала прэзідыуму раённага савета ветэранаў за высокую ацэнку яе дзейнасці на пасадзе старшыні і зазначыла, што плён работы гэтай грамадскай арганізацыі цалкам залежыць ад таго, ці наладжана супрацоўніцтва, ці знойдзена ўзаемаразуменне з кіраўніцтвам арганізацыі і прафсаюзным камітэтам. У “Жылкамгасе” гэта ёсць, таму ветэраны арганізацыі — актыўныя ўдзельнікі ўсіх спраў і культурных мерапрыемстваў, якія праходзяць у калектыве. Быць заўсёды ў курсе спраў, захоўваць аптымізм, праяўляць інтарэс да ўсіх бакоў жыцця пажадаў напрыканцы пасяджэння яго ўдзельнікам старшыня раённага савета ветэранаў Валерый Іванавіч Сураўнёў і павіншаваў усіх з надыходзячым Новым годам.
Т. ЛУКАШЭВІЧ
Фота С. РУДЗІНСКАГА
