У снежні ў Бабруйску праходзіў V абласны дзіцячы конкурс тэатральнага мастацтва. Сярод іншых удзельнікаў там былі і вучні Глускай дзіцячай школы мастацтваў — калектыў “Сузор’е”, якім кіруе настаўнік ДШМ Уладзімір Бабак. На розных конкурсных пляцоўках са сваімі выхаванцамі Уладзімір Іванавіч выступаў ужо не адзін раз, таму зараз заявіў пра ўдзел адразу ў трох намінацыях і не памыліўся — ні ў гэтым смелым кроку, ні ў падборы рэпертуару, ні ў выбары артыстаў. Вынік конкурсных выступленняў — чатыры прызавыя месцы. У намінацыі “Лепшы індывідуальны выканаўца” дыплом I ступені атрымала Святлана Лане, у тэатральным класе яна займаецца пяты год і ўжо заканчвае тут вучобу. Не падвяла свайго настаўніка і самая юная ўдзельніца, для якой гэта конкурснае выступленне стала дэбютам, — Дар’я Урбанская, як лепшы індывідуальны выканаўца яна атрымала дыплом III ступені. Ганаровае другое месца ў намінацыі “Тэатральныя калектывы” заваяваў і ўвесь калектыў “Сузор’е” Глускай школы мастацтваў, для конкурснага выступлення была выбрана музычная казка па п’есе Уладзіміра Арлова “Залатое кураня”. Яшчэ адно прызавое месца прынёс сваёй творчай групе сам яе кіраўнік Уладзімір Бабак — у намінацыі “Рэжысёр-педагог” ён удастоены дыплома III ступені.
Такімі вынікамі гэтага тэатральнага конкурсу задаволены і яго юныя ўдзельнікі, і іх настаўнік, ды і ўся школа мастацтваў, дзе сваёй мэтай бачаць не толькі навучанне выхаванцаў нотнай грамаце і ігры на музычных інструментах, але і агульнае эстэтычнае выхаванне, развіццё творчых здольнасцяў дзяцей. А яны, нашы дзеці, і насамрэч вельмі здольныя.
Таццяна ЛУКАШЭВІЧ
Фота Рамана ДАЎШЭВІЧА
