Пасля ўрокаў — на каток!

На наша пытанне, ці апраўдвае сябе набыццё і пракат канькоў, арганізаваны для наведвальнікаў катка, што ў цэнтры Глуска, старшыня фізкультурна-спартыўнага клуба Віктар Вежнавец адказаў, што ўся гэта работа не мае ніякай камерцыйнай мэты. Галоўнае — прыцягнуць да заняткаў фізічнай культурай, у прыватнасці, зімовымі відамі спорту, як мага больш людзей. Дзеля гэтага — і пракат лыж і канькоў, і лыжня на стадыёне, і каткі ў школах на хакейных каробках, і вось ужо другі год заліваецца каток у самым цэнтры Глуска.
Яно і праўда, пуста на катку бывае толькі ў першай палове дня, калі ж завяршаюцца заняткі ў школах, сюды падцягваецца вучнёўская дзетвара. Хто катаецца парамі, хто спрабуе самастойна авалодаць якім-небудзь элементам катання, а хто чапляецца за іншых паравозікам і з вясёлымі крыкамі і звонкім смехам наразае кругі. Як зазначыў Віктар Вежнавец, у буднія дні на катку бывае па 60 — 70 чалавек, па выхадных колькасць яго наведвальнікаў узрастае дзесьці ўдвая. Шмат хто катаецца і па вечарах. За музыку і дадатковае асвятленне дзякуй аддзелу культуры. Так агульнымі намаганнямі і рухаецца агульная карысная справа.
Т. ЛУГАВАЯ
Фота С. РУДЗІНСКАГА