Вось і прагналі з Глуска зіму!
У нядзелю хто з глушчан хатнімі справамі займаўся, хто ў лес ці да ракі прагуляўся, а многія прыйшлі на бульвар Грахоўскага, каб прыняць удзел у праводзінах Масленіцы. І зноў жа — хто проста на людзей паглядзеў, а хто і сябе паказаў, тым болей магчымасці для гэтага былі. Конкурсы ішлі адзін за адным: хто хутчэй з’есць блін, хто акажацца спрытнейшым у танцы з мяцёлкаю… Канешне, большасць сабраўшыхся чакала самага масавага спаборніцтва — перацягвання каната. Арганізатары ўлічылі нецярплівасць гледачоў і правялі “канат” на самым пачатку свята. А для тых, хто не быў і не бачыў, мы пакажам фатаграфіі і раскажам, хто перамог у гэтай важнай мужчынскай спартыўнай справе. У напружанай барацьбе каманда “Жылкамгаса” перамагла каманду лясгаса, каманда ПМК-249 — каманду аддзела адукацыі, “Рамбуда” — АП-15, гаргаза — райпо. А вось каманду РЭС гаргаз перамагчы не змог, таксама, як ПМК-249 не адолела “Жылкамгас”. Але на кожнага волата знаходзіцца другі волат, і ў супрацьстаянні каманд “Рамбуда” і РЭС мацнейшай аказалася апошняя. Такім чынам, у фінале за прызавыя месцы змагаліся чатыры каманды, у выніку “Рамбуд” перамог каманду ПМК-249 і заняў 3-е месца, “Жылкамгас” пераадолеў каманду РЭС і выйшаў на 1-е месца, РЭС — на 2-м месцы. Грашовыя ўзнагароды камандам-пераможцам уручыў начальнік раённага аддзела адукацыі, спорту і турызму Аляксандр Бельскі.
Але і акрамя перацягвання каната на свяце было на што паглядзець і што паслухаць. Аматары народных песень падпявалі хваставіцкай “Спадчыне”, іншым прыйшліся даспадобы песні ў выкананні артыстак Глускага РДК. Некаторыя гледачы прытанцоўвалі, асабліва самыя маленькія. А як інакш, калі на імправізаванай сцэне стаіць столькі галасістых, прыгожых, ярка апранутых жанчын? Тут хочаш-не хочаш, а ў скокі пусцішся.
Ажыўлена было і каля павільёнаў райпо, і там, дзе частавалі блінамі гаспадынькі раённага Дома культуры. А бліны смачныя былі, упэўнена кажу, бо сама каштавала. Жадаючыя набылі сувеніры з выстаўкі Заеліцкага Дома рамёстваў, некаторыя выйгралі прызы ў латарэях райпо і таго ж Дома рамёстваў.
А наперадзе была кульмінацыя. Зіма ніяк не хацела саступаць вясне, але гарачае жаданне арганізатараў свята і ўсіх прысутных перамагло. Кожны, хто хацеў пазбавіцца ад праблем, мог завязаць сімвалічную стужку на чучала Масленіцы, і ўсе тыя праблемы згарэлі разам з чучалам. І праўда, няхай гарам гараць! Бо ўжо вясна і настрой зусім вясенні. Галоўнае цяпер, каб прырода аказалася з людзьмі салідарнай і не падвяла нас завеямі ды сцюжамі.
Алена ВАЛОШКА
Фота Сяргея РУДЗІНСКАГА