Калі ўсе разам, калі ўсе дружна, то любая справа ладзіцца хутчэй і весялей, а атрыманы вынік не можа не радаваць. Вось так і пасля суботніка, які прайшоў 5 красавіка ў Глускім раёне, значна пачысцела, а месцамі і пабялела як у раённым цэнтры і аграгарадках, так і вакол вытворчых тэрыторый, у месцах адпачынку на ўлонні прыроды. У прыватнасці, месцамі прыкладання сіл працоўных сталі летняя танцавальная пляцоўка, цэнтральны стадыён, вал, тэрыторыі, што прылягаюць да царквы і могілак па вуліцы Акцябрскай, могілкі па вуліцы Максіма Горкага, уся зялёная зона па цэнтральнай вуліцы гарадскога пасёлка, канал па аб’язной дарозе і месцы аўтамабільных стаянак каля дарог, зона адпачынку “Лысуха”, прыбярэжная зона паўз раку Пціч ад лодачнай станцыі і ўніз па цячэнні, цэнтральны парк Глуска і многія іншыя месцы, дзе працуюць і любяць адпачываць глушчане. Старшыні сельскіх выканаўчых камітэтаў таксама арганізавалі вучнёўскія і працоўныя дэсанты для навядзення парадку на падведамасных ім тэрыторыях, асаблівая ўвага была ўдзелена помнікам і воінскім пахаванням.
Па словах начальніка аддзела жыллёва-камунальнай гаспадаркі райвыканкама Васіля Беразоўскага, у Глуску ў раённым суботніку прынялі ўдзел больш за 250 чалавек (дарослых і школьнікаў), працавалі 10 адзінак тэхнікі. Больш таго, адным днём справа не абыдзецца — у першай палове гэтага тыдня работнікі лясгаса прадоўжаць уборку паваленых дрэваў і зрэзанага галля з далейшай іх перапрацоўкай на шчэпкі.
Т. ЛУКАШЭВІЧ
Фота С. РУДЗІНСКАГА