У адзіным рытме
На палях вытворчага ўчастка “Бярозаўка” СВК “Калгас “Зара” наладжаны рытмічны працэс вясенніх палявых работ. Пра гэта нам падчас нядаўняй паездкі (1 красавіка) у гаспадарку распавёў памочнік начальніка вытворчага ўчастка Андрэй Ляпко.
— Тэхніку і людзей мы стараемся задзейнічаць з максімальнай карысцю. Да прыкладу, арганіку на поле вывозяць адразу тры трактары. Улічваючы, што ўчастак знаходзіцца побач з буртом, Віктар Любанец на “Амкадоры” толькі паспявае па чарзе загружаць прычэпы раскідвальнікаў, на якіх працуюць Андрэй Лазовік, Сяргей Кадуш і Аляксандр Багдановіч. Бывае, за дзень усе трое вывозяць і раскідваюць да 800 тон кампостаў. Увогуле вывозіць арганіку пачалі з 19 сакавіка.
Пра работу механізатараў Андрэй Аляксеевіч гаворыць з асаблівай павагай. А інакш і быць не можа, бо тэхніка даручана працавітым, адказным людзям, якія на пасяўной не першы год, а хто і больш за дваццаць. Гаворачы так, памочнік начальніка меў на ўвазе старэйшага з братоў Лазовікаў — Дзмітрыя, які больш за тыдзень на МТЗ 82 у счэпе з баронамі закрывае вільгаць у глебе. За кароткі тэрмін ён выканаў работы на 120 гектарах, і кожны новы дзень залічвае на яго рахунак новыя плошчы. Акрамя таго, Дзмітрый Лазовік забаранаваў яшчэ 35 гектараў канюшыны.
Пакуль мы фатаграфавалі і размаўлялі з аднымі героямі вясенняй пасяўной, другія таксама займаліся сваімі справамі. Нашага даўняга знаёмага Васіля Слука (на фота справа) мы сустрэлі непадалёк ад вёскі Бярозаўка. Пакуль паляводы Уладзімір Скрыт і сёстры Марыя, Алена і Тамара Лезнюк у сеялку “RABE” засыпалі насенне ячменю, ён не траціў марна часу. За гэтыя некалькі хвілін паспеў абгледзець тэхніку з усіх бакоў, штосьці падправіў і па-гаспадарску накіраваўся ў кабіну свайго энерганасычанага МТЗ 3022. Улічваючы, што для механізатара кожная хвіліна дарагая, мы абмежаваліся з ім кароткай размовай і пацікавіліся, як яму тут працуецца.
— Сёння я маю канкрэтнае заданне — сеяць ячмень, —расказвае Васіль Паўлавіч. — Менавіта сеялка “RABE” для гэтага больш прыстасаваная. У гэтай брыгадзе пачаў з поля, што каля Зелянковіч, там і пасеяў першыя 56 гектараў ячменю. Зараз заканчваю засяваць 70-гектарнае поле, потым пераеду на другое. У цэлым на гэтым вытворчым участку павінен пасеяць 200 гектараў ячменю, а там пойдуць іншыя культуры. Вясеннюю пасяўную буду завяршаць кукурузай. Так што работы шмат, галоўнае, каб надвор’е спрыяла, тады і настрой адпаведны будзе.
З добрым настроем выходзіць на сваім МТЗ 3022 яшчэ адзін механізатар — Сяргей Малаковіч. У яго іншая задача — узворванне глебы пад яравыя культуры. Старт атрымаўся неблагі: менш чым за тыдзень ёсць 120 гектараў. У такім тэмпе механізатар намераны працаваць і далей. І, гаворачы пра вясеннія палявыя работы, нельга не сказаць пра тых, хто корміць іх удзельнікаў. Каторы год смачныя абеды сясцёр Галіны Чабанюк і Вольгі Расцягаевай гарачымі дастаўляюцца прама на палявы стан.
В. ЧУЧВАЛ
Фота С. РУДЗІНСКАГА