Гэтае лета праходзіць пад знакам юбілею вызвалення краіны ад нямецка-фашысцкіх захопнікаў. У сённяшнім нумары газеты расказваецца, як глушчане 28 чэрвеня адзначалі 70-годдзе вызвалення раёна. А ўжо заўтра, 3 ліпеня, мы разам з усімі беларусамі будзем святкаваць Дзень Незалежнасці, роўна 70 год, як быў вызвалены Мінск, а значыць, і ўся рэспубліка ачысцілася ад фашысцкай навалы. Каля мемарыяльнага комплексу “Воінская слава” ў 10 гадзін раніцы пачнецца Вахта Памяці. Тут жа з’явіцца яшчэ адно памятнае месца, якое будзе нагадваць пра вайну і вызваленне раёна: будзе ўстаноўлена дывізіённая гармата Д-44, урачыстая цырымонія адкрыцця пройдзе пасля традыцыйнага ўскладання вянкоў працоўнымі калектывамі горада, якое адбу-дзецца таксама ў 10 гадзін.
Канцэрт “Мы за цябе сэрцам, Беларусь!” пачнецца на цэнтральным стадыёне райцэнтра ў 12 гадзін, пазней, у 17:00, сюды ж запрашаюцца аматары спорту на футбольны матч сярод зборных гарадскіх школ. Таксама на стадыёне з 10:00 да 16:00 разгорнецца гандлёвы кірмаш мясцовага райпо, да таго ж можна бу-дзе паспрабаваць “салдацкай кашы”. Завершацца святочныя мерапрыемствы каля раённага Дома культуры ў 22:50 маладзёжнай рэспубліканскай акцыяй “Праспяваем гімн разам”, дарэчы, запрашаецца не толькі моладзь, а і ўсе жадаючыя.
Большасць з нас на гэтым тыдні адпачываць будзе не звыклыя суботу і нядзелю, а цэлыя чатыры дні, і завершацца доўгія выхадныя святам Купалля. Днём 6 ліпеня ўсе дружненька сходзім у лес па гаючыя чарніцы, а ўвечары можна будзе прагуляцца, як кажуць, у людзі. У 19:00 на цэнтральным стадыёне распачнецца дзіцячая забаўляльная праграма “Купальскія ігрышчы”, адразу пасля яе, у 20:00, — святочны абрад і канцэрт “Купальскія забавы”, падрыхтаваны артыстамі Заеліцкага Цэнтра культуры і вольнага часу і Клятнянскага Дома культуры.
З 18 да 23 гадзін на стадыёне будзе наладжаны гандлёвы кірмаш. Начная дыскатэка пройдзе традыцыйна з 22 гадзін да паловы трэцяй ночы, але ў сувязі са святам не ў памяшканні, а на адкрытай танцавальнай пляцоўцы.
Адным словам, захочаце павесяліцца — прыходзьце. Толькі памятайце, што ва ўсім патрэбна ведаць меру, і правілы паводзін у грамадскіх месцах ніхто не адмяняў, і на работу пасля доўгага адпачынку выходзіць трэба. Калі ўсе будуць паводзіць сябе прыстойна, то і святы застануцца прыемным успамінам.
