Першы абласны фестываль-кірмаш працаўнікоў вёскі “Дажынкі-2014” ужо застаўся ў гісторыі. Месцам правядзення свята быў абраны аграгарадок Мышкавічы, цэнтральная сядзіба СВК “Рассвет” імя К. П. Арлоўскага Кіраўскага раёна. І трэба зазначыць, што першы блін не выйшаў комам, кіраўчане і ўсе, хто ім дапамагалі, арганізавалі свята на славу, прадумаўшы ўсё да апошніх дробязяў.
Канешне, у цэнтры ўвагі былі хлебаробы. Выступаючы на ўрачыстай цырымоніі ўзнагароджання пераможцаў абласнога спаборніцтва на ўборцы ўраджаю збожжавых і зернебабовых культур, старшыня Магілёўскага аблвыканкама Пётр Руднік адзначыў, што такі вялікі хлебны каравай — амаль 1,4 млн т — Магілёўшчына атрымала ўпершыню за ўсю гісторыю “Дажынак”. “За гэтымі лічбамі — самаадданая праца аграрыяў, — падкрэсліў губернатар. — На палях вобласці ў перыяд масавай уборкі працавалі каля 1,6 тыс. экіпажаў зернеўборачных камбайнаў і вадзіцеляў. На сушцы і дапрацоўцы зерня было задзейнічана звыш 450 зернеачышчальна-сушыльных комплексаў. У бягучым годзе 640 экіпажаў намалацілі звыш адной тыс. т зерня, 11 — звыш 3 тыс. т і адзін экіпаж — звыш 6 тыс. т. Найбольшая колькасць тысячнікаў у Мсціслаўскім раёне — 68, Магілёўскім — 63, Горацкім — 60 і Шклоўскім — 52”.
Абсалютны рэкорд па намалоце збожжа, уключаючы масланасенне рапсу, належыць экіпажу Вячаслава Карповіча і Мікалая Рабцава (ААТ “Александрыйскае” Шклоўскага раёна), які намалаціў 6,61 тыс. т. На другім месцы — сямейны экіпаж Мельнікавых з агракамбіната “Зара” Магілёўскага раёна, які намалаціў 6 тыс. т. Ненашмат адстаў ад лідараў і сямейны экіпаж Корсакаў з гэтай жа гаспадаркі — 5,6 тыс. т.
Высокія вынікі атрыманы вадзіцелямі на адвозцы збожжа ад камбайнаў. Сярод лепшых — Лангуры Хасія (агракамбінат “Зара” Магілёўскага раёна, звыш 6,5 тыс. т), Яўген Васільеў і Дзяніс Латыпаў (ААТ “Александрыйскае” Шклоўскага раёна, 6,2 тыс. т і 5,5 тыс. т адпаведна).
Добрых слоў заслугоўваюць лепшыя аператары сушыльных установак. Гэта Віктар Кухарэнка і Аляксандр Бакштаеў (агракамбінат “Зара” Магілёўскага раёна, высушана 25,1 тыс.т зерня), Віктар Еўдакімаў, Сяргей Сіўчанка, Аляксандр Максіменка (СВК “Рассвет” імя. Арлоўскага, 14,8 тыс. т).
Штогод высокіх вынікаў на ўборцы збожжавых і зернебабовых культур дасягаюць СВК “Гігант” Бабруйскага раёна (ураджайнасць — 82,1 ц/га), ААТ “Цішоўка” Магілёўскага раёна (77 ц/га), ААТ “Александрыйскае” Шклоўскага (75,2 ц/га). У дзевяці сельгасарганізацыях вобласці ўраджайнасць збожжа перавысіла 65 ц/га. На працягу шэрага гадоў (2011 — 2014) лідарам па ўраджайнасці збожжавых культур з’яўляецца Шклоўскі раён, сёлета тут у сярэднім на круг намалочана 59,5 ц/га, а на адным з палёў “Александрыйскага” атрымана фантастычная для нашых шырот ураджайнасць — 97,7 ц/га.
Кіраўнік вобласці павіншаваў працаўнікоў сяла і тых, хто прымаў удзел у кампаніі па ўборцы збожжавых і зернебабовых, з дасягнутымі высокімі вынікамі і ўручыў пераможцам абласных спаборніцтваў дыпломы і грашовыя прэміі. А вось тром лідарам сярод камбайнераў — Вячаславу Карповічу, Уладзіміру Мельнікаву і Уладзіміру Корсаку — былі перададзены ключы ад аўтамабіляў “Джылі”.
У ліку запрошаных на свята была і дэлегацыя Глускага раёна — старшыня райвыканкама Юрый Дымша, начальнік упраўлення сельскай гаспадаркі і харчавання Канстанцін Голуб, старшыня раённага Савета дэпутатаў Андрэй Баброўнік, кіраўнікі сельгасарганізацый і іншыя працаўнікі раёна. Глушчане прынялі ўдзел ва ўрачыстым адкрыцці абласных “Дажынак” і цырымоніі ўзнагароджання.
Святочны настрой герояў і гасцей свята падтрымлівалі больш за дзве тысячы артыстаў. Творчыя калектывы з усіх куткоў вобласці выступалі на розных тэматычных пляцоўках. Ах, які прыгожы і смачны нават на выгляд быў на “Свяце Сала” кошык, сплецены са смажаных каўбас! А парсюкі — і смажаныя, і запечаныя, і з агароднінай, і з хрэнам, і з рознымі іншымі прысмачкамі! А прыгажуня бульба на “Свяце Бульбы”! Такой не грэх было і дадому прывезці, як кажуць, на развод. Тым больш што магчымасць была не толькі паспытаць прыгатаваныя з душой стравы, але і выйграць з паўмеха адборнай картопелькі. Чым, дарэчы, некаторыя глушчане і скарысталіся. (Увогуле, сваіх землякоў мы сустрэлі там нямала; упэўнена, ніхто з іх не пашкадаваў, што паехаў). А знакамітыя слаўгарадскія сыры! Яны там таксама былі. Можа, кошт крыху і кусаўся, але ж дэгустацыю ніхто не адмяняў: там кавалачак, тут на зубок — і смаката ў роце, і купляць не трэба. Канешне, пра ўсё не раскажаш, што гаварыць — свята трэба самому адчуць. Таму раскажу проста пра сваіх, пра глускіх.
Вось, напрыклад, артыстаў з ансамбля “Крынічанька” мы сустрэлі на “Свяце Мёду”, а яшчэ яны прадстаўлялі на цырымоніі адкрыцця ўсё тое, чым славіцца Глушчына. На выставе-кірмашы “Магілёўшчына майстравая” дэманстравалі свае вырабы і давалі майстар-класы заеліцкія рамеснікі. Сваю прадукцыю вывезлі ў Кіраўск “Глускія Бытпаслугі”, а таксама работнікі Веснаўскага дзіцячага дома. (Дарэчы, гандаль у Кіраўску разгарнуўся сапраўды шырока, на любы густ і кашалёк: тут можна было са зніжкамі набыць і паліто ад “Элемы”, і абутак ад беларускіх вытворцаў, і розныя рэчы ручной работы, не кажучы ўжо пра сувеніры.) Прадстаўнікі БРСМ з усіх раёнаў вобласці наладзілі пляцоўку з конкурсамі і песнямі, глускі райкам БРСМ тут таксама адзначыўся.
Канешне, не ўсё і не ўсіх я пералічыла, не пра ўсе расказала, ды гэта і немагчыма. Але свята хлебаробаў, паверце, удалося. Малайцы кіраўчане, пастараліся. Можа, калі-небудзь прыйдзе такое свята і на нашу Глушчыну, дык і мы тады пакажам, на што здатныя.
Аксана ВАСІЛЕЎСКАЯ
Фота аўтара
