На раённым свяце “Дажынкі-2014”, што адбылося ў Катцы на мінулым тыдні, прайшло нямала спартыўных спаборніцтваў, у тым ліку ў рамках раённай спартакіяды сярод СВК. Гаворка ідзе пра спаборніцтвы па міні-футболе, у якіх прынялі ўдзел чатыры каманды. У выніку праведзеных сустрэч перамога дасталася футбалістам СВК “Калгас “Слаўгарадскі”, на другім месцы — гаспадары пляцоўкі, каманда СВК “Калгас “Зара”, трэцімі сталі спартсмены з эксперыментальнай базы “Глуск”, за імі каманда СВК “Дружба”.

Нямала было жадаючых памерацца сіламі праз падніманне гіры: 25 чалавек пачаргова падыходзілі да 16-кілаграмовага снарада. Найбольшы вынік — 80 падніманняў — паказаў Ігар Паўлях; 43 разы падняў гіру і заняў другое месца Уладзімір Лясун, 37 падніманняў і трэцяе месца — за Уладзімірам Тупіцам.

Цікава і з не меншым напружаннем для гледачоў і, зразумела, саміх удзельнікаў прайшлі спаборніцтвы па армрэстлінгу. Тут па сіле рук і хуткасці рэакцыі не было роўных Міхаілу Багуку — ён стаў пераможцам. Другое месца заняў Дзмітрый Каржнёў, трэцім у спаборніцтвах па армрэстлінгу быў Уладзімір Лясун.

Спецыфіка такога віду спорту, як дартс, дазваляе спаборнічаць людзям рознага ўзросту і роду заняткаў, таму ці дзіўна, што на прайшоўшых у Катцы спаборніцтвах на трапнасць быў сярод прызёраў і школьнік, Міша Кульба, які заняў 3-е месца, былі і больш вопытныя ўдзельнікі, гэта Андрэй Мядзведка, за якім 2-е месца, а пераможцам стаў Леанід Папкоўскі, ён набраў 47 ачкоў з 60 магчымых.

У насычанай спартыўнай праграме раённых “Дажынак” было таксама і перацягванне каната. Як патлумачылі нам у аддзеле адукацыі, спорту і турызму, усе пераможцы і прызёры спаборніцтваў былі ўзнагароджаны грашовымі прэміямі. Агульны прэміяльны фонд спартыўных мерапрыемстваў склаў паўтара мільёна рублёў.