Сустрэчу са сваімі падшэфнымі правялі супрацоўнікі ад-дзела ўнутраных спраў. Паміж школай № 2 і райаддзелам міліцыі склаліся сапраўды шэфскія адносіны, таму работнікі праваахоўных органаў тут нярэдкія госці. На гэты раз навучальную ўстанову наведалі намеснік начальніка райаддзела па ідэалагічнай рабоце і кадравым забеспячэнні Барыс Налівайка і інспектар крымінальна-выканаўчай інспекцыі Сяргей Лосік.
Сустрэча насіла прафарыентацыйны характар: вучням дзясятых і адзінаццатага класа расказалі пра Магілёўскі інстытут і Акадэмію Міністэрства ўнутраных спраў — вышэйшыя навучальныя ўстановы, дзе рыхтуюць афіцэраў міліцыі (міліцыі грамадскай бяспекі і крымінальнай міліцыі). Адметна, што цяпер сюды прымаюць і дзяўчат — на спецыяльнасці, звязаныя з праваахоўнай дзейнасцю. Школьнікі з увагай паглядзелі відэафільм “Я — курсант”, з вялікай цікавасцю паслухалі пра тыя спецсродкі, што ёсць на ўзбраенні ў органах унутраных спраў, а потым і прымерылі некаторыя з іх на сябе. Адчуўшы цяжар каскі 2-й ступені абароны і тытанавага шчыта, юнакі зразумелі, што фізічная падрыхтоўка для супрацоўніка міліцыі адыгрывае не апошнюю ролю.
Т. ЛУКАШЭВІЧ
Фота С. РУДЗІНСКАГА
