Некаторая сума грошай дадаткова пераразмеркавана паміж распарадчыкамі бюджэтных сродкаў. На мінулым тыдні адбылася нечарговая сесія Глускага раённага Савета дэпутатаў, на якой было разгледжана некалькі фінансавых пытанняў. З адпаведнай інфармацыяй перад дэпутатамі выступіла намеснік начальніка фінансавага аддзела райвыканкама Святлана Лук’янчук. У прыватнасці, было прапанавана пераразмеркаваць сродкі сельскім выканаўчым камітэтам: Калаціцкаму сельвыканкаму — 9 мільёнаў рублёў, а Каткаўскаму сельвыканкаму — 48 мільёнаў 100 тысяч — на расходы па валцы дрэваў; Завалочыцкаму сельвыканкаму — 7 мільёнаў 100 тысяч рублёў і 13 мільёнаў рублёў Казловіцкаму сельвыканкаму — на бягучыя рамонты агароджы могілак. Таксама сродкі ў суме 16 мільёнаў 300 тысяч рублёў вы-дзелены Слаўкавіцкаму выканаўчаму камітэту на вулічнае асвятленне населеных пунктаў, а Хваставіцкаму сельвыканкаму на ачыстку канала даецца дадаткова 27 мільёнаў рублёў. Заслухаўшы выступленне спецыяліста, дэпутаты пагадзіліся з прапановай і аднадушна прагаласавалі за яе прыняцце.
Таццяна ЛУКАШЭВІЧ
