Шкаляры ўжо прывыклі, што зімовыя канікулы пачынаюцца акурат напярэдадні каталіцкіх Калядаў. Дык вось у гэтым годзе ўсё не так, апошні дзень заняткаў прыпадае на суботу, 27 снежня. Праўда, з улікам пераносу выхадных і рабочых дзён гэта, напэўна, неістотна паўплывае на колькасць урокаў. А вось вучыцца пасля вялікага перапынку дзеці пачнуць толькі 12 студзеня. Каб за такі час дзяўчынкі і хлопчыкі не забыліся дарогу ў школу, ды і правялі вольны час з карысцю, ва ўсіх школах раёна будуць працаваць аздараўленчыя лагеры дзённага знаходжання, а на базе СШ № 1 і гімназіі дадаткова арганізуюцца спартыўна-аздараўленчыя лагеры. Наведваць іх змогуць 323 вучні, у тым ліку ў спартыўных лагерах будуць заняты 45 выхаванцаў дзіцяча-юнацкай спартыўнай школы Глуска, паведаміла рэдакцыі метадыст раённага аддзела адукацыі, спорту і турызму Валянціна Галамака.
А. ВАСІЛЕЎСКАЯ
