Месяц кастрычнік і нашы даходы
З паказчыкам 4 684 400 рублёў Глускі раён займае чатырнаццатае месца сярод сельскіх раёнаў вобласці па ўзроўні намінальнай налічанай сярэднямесячнай заработнай платы за кастрычнік гэтага года. А за перыяд з пачатку года — мы па гэтым паказчыку знаходзімся на 15 месцы ў вобласці. Даведка: намінальная налічаная сярэднямесячная заработная плата па вобласці ў кастрычніку 2014 года склала 5 295 700 рублёў.
У параўнанні з вераснем зар- плата за кастрычнік павялічылася ў сярэднім на 67 300 рублёў. Паказчык па росту зарплаты за дзясяты месяц года па раёне ў цэлым выкананы амаль на 102 з паловай працэнты, аднак 12 мясцовых арганізацый з даведзеным заданнем не справіліся. Гэта ААТ “Глускія Бытпаслугі”, ЗАТ “Глускдрэў”, СВК “Дружба”, калгасы “Слаўгарадскі” і “Зара”, эксперыментальная база “Глуск”, ДРБУ-213, РУП “Белпошта”, Глускае раённае спажывецкае таварыства, УКП “Жылкамгас”, санаторная школа-інтэрнат, а таксама аддзел ідэалагічнай работы, культуры і па справах моладзі.
Перавышаюць сярэднераённы паказчык па заработнай плаце ў кастрычніку будаўнічыя арганізацыі Глуска. Так, у ААТ ПМК-86 “Водбуд” заробкі склалі 4 млн 935 тыс. рублёў, што адпавядае прыкладна 460 доларам ЗША ў эквіваленце; работнікі ААТ “Глускі Рамбуд” атрымалі ў сярэднім па 5 млн 670 тыс., а гэта каля 530 долараў ЗША; больш плённа папрацавалі ў Глускай ПМК-249: зарплата за кастрычнік тут перавысіла 10 мільёнаў рублёў і адпаведна тысячу долараў у эквіваленце.
Разам з гэтым у 11 арганізацыях раёна некаторым работнікам праводзілася даплата да ўзроўню мінімальнай, а яна з улікам індэксацыі на 13 % у кастрычніку склала 1 841 483 рублі.