З 20 снежня па 5 студзеня ў рамках дабрачыннай акцыі “Нашы дзеці” ў раёне пройдуць навагоднія ранішнікі. Павіншаваць малых са святамі прыйдуць старшыня раённага выканаўчага камітэта, яго намеснікі, кіраўнікі структурных падраздзяленняў райвыканкама і мясцовых аргані-зацый. Зразумела, віншаванні будуць падмацаваны салодкімі падарункамі. Традыцыйна першымі на святочным маршруце кіраўніка раёна стануць сацыяльна-педагагічны цэнтр у Калацічах і Цэнтр карэкцыйна-развіваючага навучання і рэабілітацыі, навагоднія сустрэчы тут пройдуць 24 снежня. У гэты ж дзень каля ёлкі са сваімі шэфамі і сябрамі сустрэнуцца выхаванцы санаторнай школы-інтэрната. Раённы дабрачынны ранішнік намечаны на 5 студзеня, ён пройдзе ў кінатэатры “Арыён” і збярэ ў карагод паўсотні хлопчыкаў і дзяўчынак з усіх школ раёна. У Магілёў на губернатарскую ёлку 29 снежня запрошаны 10 мясцовых школьнікаў.
Не застануцца без віншавання ад Дзеда Мароза і пацыенты дзіцячага аддзялення раённай бальніцы — навагоднія падарункі атрымаюць усе, хто будзе знаходзіцца там 30 снежня. Рашэнне аб правядзенні гэтых дабрачынных навагодніх мерапрыемстваў прынята раённым выканаўчым камітэтам. А літаральна з заўтрашняга дня пачынаецца марафон навагодніх ранішнікаў і вечароў у навучальных установах раёна і дзіцячых садках, прадоўжыцца ён аж да 30 снежня.
Т. ЛУГАВАЯ
