Незабыўны, яркі, казачны, музычна-песенна-вершаваны, хараводны,  а галоўнае, шчодры на падарункі і ўсмешкі дзяцей і дарослых атрымаўся пераднавагодні марафон, які прайшоў, праімчаўся, праляцеў па раёне 24 снежня ў рамках рэспубліканскай акцыі “Нашы дзеці”.

Пачатак дабрачыннаму марафону традыцыйна быў пакладзены ў сацыяльна-педагагічным цэнтры, што ў Калацічах. Павіншаваць яго маленькіх выхаванцаў (зараз тут знаходзіцца дзевяць дзяцей) прыехалі намеснік старшыні Глускага раённага выканаўчага камітэта Людміла Клыга, начальнік аддзела адукацыі, спорту і турызму Аляксандр Бельскі, член Савета Рэспублікі Нацыянальнага сходу РБ Ніна Касцян. Не абышлі ўвагай сваіх падшэфных эксперыментальная база “Глуск” і раённае спажывецкае таварыства. Што было пажадаць гэтым малым? Зразумела, хутчэй вярнуцца дадому (усе дзеці знаходзяцца ў прытулку часова, па заявах бацькоў), быць разам са сваімі блізкімі, адчуваць на сабе іх клопат і пяшчоту. А каб Новы год прайшоў запамінальна і весела, усе атрымалі падарункі: тут табе і салодкія пачастункі, і цэлы мех цацак, і кніжкі, і карціны, і набор кухоннага посуду — каб смачнейшай была ежа.

Традыцыйна разам, традыцыйна дружна сабраліся пад Новы год каля прыгожай ёлкі малыя і дарослыя наведвальнікі “ірландскага дома”. Яны даўно чакалі гэтага свята, рыхтаваліся да яго, шылі касцюмы, вучылі ролі, каб навагодняя казка атрымалася прыгожай, добрай і вясёлай. Агульнымі намаганнямі так усё і склалася, а пачатак добраму настрою быў пакладзены віншаваннямі ад Людмілы Клыгі і Ніны Касцян, ад шэфаў, сяброў і памочнікаў — ААТ “Глускія Бытпаслугі” ў асобе дырэктара Віктара Патапенкі, УКП “Жылкамгас” у асобе намесніка дырэктара Дзмітрыя Арцёмчыка, ААТ “Глускае райаграпрамтэхзабеспячэнне” ў асобе дырэктара Сяргея Падгорнага. Таксама былі на свяце і падтрымалі агульны настрой начальнік упраўлення па працы, занятасці і сацыяльнай абароне Алена Кірэй, начальнік аддзела адукацыі Аляксандр Бельскі, дырэктар цэнтра сацыяльнага абслугоўвання насельніцтва Анжэла Палупанкова. Што да падарункаў, то іх усе і пералічыць цяжка: наборы цукерак атрымалі ўсе наведвальнікі аддзялення дзённага знаходжання для людзей з інваліднасцю і Цэнтра карэкцыйна-развіваючага навучання і рэабілітацыі, а яшчэ былі падораны вазы, кнігі і карціны, канцылярскія прылады, пыласос і радыёмікрафон. Дзеці і хворыя людзі — асабліва чуллівыя на клопат, дабро і ласку, таму яны не толькі з радасцю прымалі навагоднія падарункі, але і самі з не меншым задавальненнем паднеслі гасцям зробленыя сваімі рукамі сувеніры — як падзяку, як напамін пра гэту добрую святочную нагоду.

Калі прыязджаеш у Веснаўскі дом-інтэрнат, то адчуваеш сябе, як у вялікай дружнай сям’і. Калі трапляеш сюды пад Новы год, то трапляеш яшчэ і ў сапраўдную казку, на гэты раз — у “Зімовую казку”. Прыгожа прыбраныя сцэна і зала, касцюмы герояў такія рэалістычныя, а ігра іх такая пераканаўчая, што не адразу разумееш, дзе выхавацелі, а дзе выхаванцы. Тут, у гэтым доме, заўсёды так, адны па-сапраўднаму жывуць і вучацца, другія па-сапраўднаму выкладваюцца і працуюць. Таму я не здзівілася, калі ад гасцей, якія прыехалі ў Веснава ўпершыню, зноў пачула і пра сям’ю, і пра самаадданасць, і пра творчы падыход. Такімі сваімі ўражаннямі падзяліліся начальнік аддзела па гендарнай палі-тыцы Міністэрства працы і сацыяльнай абароны Вера Лабковіч і старшыня абкама прафсаюза работнікаў аграпрамысловага комплексу Віктар Гейдэль. Мікалай Казакоў, намеснік старшыні камітэта па працы, занятасці і сацыяльнай абароне Магілёўскага аблвыканкама, як і намеснік старшыні Глускага райвыканкама Людміла Клыга, у гэтым доме-інтэрнаце ўжо даўно не госці, а добрыя сябры, але і яны не ўтрымаліся, каб у чарговы раз не адзначыць старанную працу ўсяго калектыву на чале з дырэктарам Вячаславам Клімо-вічам. Таму і пажаданні ад усіх — самыя добрыя, самыя шчырыя і вельмі патрэбныя — каб жылося мірна і спакойна, каб хапала нам таго, што ёсць, каб сапраўдныя любоў і дружба, дабрабыт і шчасце прыйшлі да кожнага з нас. Ну а для добрага настрою тут і зараз былі, вядома ж, падарункі — разнастайныя ласункі, пральная машына і сапраўдны святочны феерверк.

Дабрачынная акцыя “Нашы дзеці” аб’ядноўвае дзяцей і дарослых, дапамагае знайсці новых сяброў і сустрэцца даўнім знаёмым. І не проста сустрэцца, а павесяліцца ад душы і нават усім разам стаць удзельнікамі незвычайнага дзеяння. Так адбылося і ў санаторнай школе-інтэрнаце, дзе быў нала-джаны сапраўдны навагодні кірмаш — з гаманкімі гандлярамі, з  чарнавокаю гадалкай і вясёлымі скамарохамі. А сапраўднае вяселле пачалося, калі прыйшлі сюды Дзед Мароз са сваёй Снягурачкай ды яшчэ і паважаных гасцей запрасілі — намесніка генеральнага дырэктара Магілёўскага лесагаспадарчага аб’яднання Сяргея Шаха, галоўнага ляснічага Глускага лясгаса Аляксея Бахановіча, намесніка дырэктара Бабруйскага гандлёвага цэнтра Аляксандра Кустоўскага. Госці, зразумела, прыйшлі не з пустымі рукамі: падарункі падабралі і для дзяцей (салодкія наборы), і для ўсёй установы (фотакамера, машына для кухні і сродкі на добраўпарадкаванне).

Немагчыма, мабыць, падлічыць, колькі сустрэч, падарункаў і колькі радасці прыносіць сваім удзельнікам дабрачынная акцыя “Нашы дзеці”. Шкада, што яна бывае толькі раз у год. Але вельмі добра, што праводзіцца яна якраз пад Новы год, робіць гэта свята больш адчувальным і дапамагае спраўдзіцца многім дзіцячым спадзяванням. Ужо дапамагла і яшчэ дапаможа.

Таццяна ЛУКАШЭВІЧ

Фота Сяргея РУДЗІНСКАГА