Прафсаюзы адкрываюць новыя імёны
Добрая ўсё-такі ў нас работа. У пятніцу з раніцы я пабывала на фестывалі даследчых работ дашкольнікаў і малодшых школьнікаў, дзе ад дзетак даведалася шмат новага і карыснага для сябе, а пасля абеду адправілася на фестываль вакальны — сярод дарослых. Дакладней, не зусім фестываль, а конкурс — рэспубліканскі, арганізаваны Федэрацыяй прафсаюзаў Беларусі пры падтрымцы Міністэрства культуры і Нацыянальнай дзяржтэлерадыёкампаніі, а 20 лютага ў “Арыёне” праходзіў раённы этап. Назва конкурсу гаворыць сама за сябе: “Новыя імёны Беларусі”, і праходзіць ён пад дэвізам “Адкрываем новыя імёны разам!”. Разам — гэта значыць, што канкурсантам, каб дабрацца да самай вяршыні, трэба будзе спачатку прайсці скрозь сіта некалькіх адбораў — раённага, абласнога, а не адразу ехаць на кастынг да прадзюсараў ды іншых шоу-бізнесменаў.
Хто будзе прадстаўляць Глушчыну на абласным этапе, вырашала журы: Аляксандр Леўчанка — старшыня Глускага раённага аб’яднання прафсаюзаў, Наталля Гулевіч — начальнік аддзела ідэалагічнай работы, культуры і па справах моладзі райвыканкама, Юлія Стаўская — першы сакратар райкама БРСМ, Вольга Огур — дырэктар раённага Дома культуры і Ірына Грамыка — галоўны рэдактар газеты “Радзіма”.
Па ўмовах, канкурсанты павінны ўваходзіць у прафсаюз і не быць маладзейшымі за 16 і старэйшымі за 31 год. Першапачаткова замовілі свой удзел 12 чалавек, але па розных прычынах у конкурсны дзень на сцэну выйшлі толькі 8. Назаву іх у тым парадку, як яны згодна з жараб’ёўкай выступалі. Вольга Прыдыбайла, урач-педыятр раённай бальніцы, несумненна, хвалявалася — першаму заўсёды цяжка. Заўважна хваляваўся і Дзмітрый Варанец з лясгаса, які выбраў для выступлення адну з песень Сяргея Трафімава. Алена Каламіец, галоўны бухгалтар Веснаўскага дома-інтэрната, атрымала ў падтрымку кветкі ад паклонніка. Тэмпераментная Вольга Філіпенка, педагог-арганізатар Заеліцкай школы, заставіла прыплясваць усю залу. Загадчыца аўтаклуба РДК Анастасія Патапенка выканала патрыятычную песню аб родным краі, Аліна Мендзель, эканаміст з калгаса “Зара”, — заліхвацкую песню “Горка”. Ні на секунду не разгубілася Святлана Толсцік, намеснік старшыні па ідэалагічнай рабоце СВК “Калгас “Зара камуны”, калі напачатку ў яе не ўключыўся мікрафон. А вось лірычную кампазіцыю ў выкананні Марыі Пастушонак, што прадстаўляла глускую сярэднюю школу № 1, у зале слухалі прытаіўшы дыханне. Дарэчы (мяркую па водгуках гледачоў пасля мерапрыемства), многія са спевакоў, хоць і не прафесійныя артысты, і выступаюць нядаўна, ужо займелі сваіх прыхільнікаў.
На жаль, не вынайшлі яшчэ такога, каб у папяровай газеце змясціць не толькі фатаграфіі, а і відэаролікі. Шчыра скажу: прыемна было і слухаць канкурсантаў, і глядзець на іх, прыгожых, элегантна апранутых, як і належыць сапраўдным артыстам. Але ўсё прыемнае мае звычку хутка заканчвацца. Як з васьмі выбраць трох, калі і той спяваў няблага, і гэты за душу крануў, і ўвогуле ўсе яны добрыя дзяўчаты і хлопцы (дакладней, адзін хлопец)? Конкурсная камісія раілася доўга. Вынікі абвясціў старшыня журы Аляксандр Леўчанка. Да абласнога этапа будуць рыхтавацца Марыя Пастушонак, Вольга Філіпенка і Анастасія Патапенка. Яны ж атрымалі падарункі ад аб’яднання прафсаюзаў, а ўсе іншыя — сертыфікаты ўдзельнікаў конкурсу “Новыя імёны Беларусі”. Дзякуй усім, хто спяваў, а таксама арганізатарам за добры настрой, ну а пераможцам жадаем поспеху ў наступным туры!
Аксана ВАСІЛЕЎСКАЯ
Фота Сяргея РУДЗІНСКАГА
На здымках: удзельнікі конкурсу; старшыня раённага аб’яднання прафсаюзаў Аляксандр Леўчанка ўзнагароджвае Анастасію Патапенку