Рыбацкае шчасце з прызамі
Мінулыя выхадныя выдаліся багатымі на падзеі. Пакуль большая частка жыхароў раёна адпачывала і святкавала Масленіцу, некаторыя заўзятыя аматары рыбалкі спрабавалі сваё рыбацкае шчасце на Мыслачанскім возеры. Тут праходзілі спаборніцтвы па рыбнай лоўлі з лёду на мармышку, якія наладзіла раённая арганізацыя таварыства рыбаловаў і паляўнічых.
Што такое мармышка, рыбакі ведаюць, а для недасведчаных патлумачу так, як мне самой растлумачылі, — гэта такая рыбалоўная снасць, якая складаецца з маленькага кручка з грузікам, часта бліскучым (каб рыбу зацікавіць). Ловяць на гэтую самую мармышку якраз-такі пераважна зімою, бо для лета ў рыбакоў ёсць нейкія іншыя лоўкія прыстасаванні. Дык вось, вернемся да нашых удзельнікаў. Магчыма, таму, што такое мерапрыемства праводзілася ўпершыню, іх было не так многа — усяго пяць. Пералічу пайменна: Глеб Пятроў, Сяргей Арцёмчык, Сяргей Ліневіч, Віталь Гатавец і Андрэй Новікаў.
Пакуль падрыхтаваліся, уладкаваліся — ужо і старт дадзены. Дзве з паловай гадзіны было на тое, каб налавіць рыбкі. Мяркую, для балельшчыкаў, якіх прыехала болей за ўдзельнікаў, час крыху сцягнуўся, а вось для саміх рыбакоў, якія могуць з вудай сядзець і цэлы дзень, праляцеў незаўважна. Пасля ўзважвання здабычы высветлі-лася, што самы вялікі ўлоў — 160 грамаў, самы маленькі — 11 грамаў. Адпаведна вынікам былі размеркаваны і прызы: за 1-е месца, а яго заваяваў Глеб Пятроў (на здымку зверху), — набор рыбалова ў скрынцы, за 2-е месца, якое дасталося Сяргею Арцёмчыку, — добрая такая вуда, за 3-е месца Віталю Гатаўцу — ліхтарык. Двум астатнім удзельнікам таксама дасталіся суцяшальныя падарункі.
Ну што ж, цяжкі толькі пачатак. Наступныя спаборніцтвы па рыбнай лоўлі, абяцаюць арганізатары, адбудуцца ўжо летам. Спадзяёмся, што тады і ўдзельнікаў збярэцца паболей, і ўлоў іхні будзе больш важкім.
А. ПЯТРОВА
Фота С. РУДЗІНСКАГА
Анекдот у тэму:
Кажуць, што рыба добра клюе ўчора, заўтра і на тым беразе.