Дзень напярэдадні 8 Сакавіка вучні 7 “А” класа гімназіі і іх мамы вырашылі правесці актыўна, весела, цікава, а галоўнае — разам і наладзілі для сябе спартыўнае свята.
У спартзале сустрэліся тры каманды — “Здаравякі”, “Тарнада” і “Экстрым”. Ці трэба казаць, што мамы вельмі хваляваліся, каб не падвесці сваіх дзяцей у спартыўнай барацьбе, і стараліся быць хуткімі, спрытнымі, трапнымі, вынослівымі. Вядучыя гэтай сустрэчы, дзве Анастасіі, Анцюшэня і Ермакова, падтрымлівалі і падбадзёрвалі ўдзельнікаў добрымі словамі і віншаваннямі. А яшчэ на працягу праграмы, паміж спартыўнымі конкурсамі, у якасці музычных падарункаў мамам і ўсім жанчынам гучалі прыгожыя песні ў выкананні Валерыі Хлань, Наталлі Дзяшчэні, Анастасіі Ермаковай, Ганны Каржнёвай, Аліны Прыгары і Ганны Анцюшэні.
Пасля падвядзення вынікаў усе ўдзельнікі спартыўнай праграмы атрымалі заслужаныя ўзнагароды, а мамам усяго 7 “А” іх дзеці падарылі вялікія прыгожыя ружы, зробленыя сваімі рукамі. Але і на гэтым сюрпрызы не скончыліся: свята са спартыўнай залы перамясцілася ў клас і знайшло свой працяг за салодкім сталом. Дарэчы, пачастункі былі таксама прыгатаваны дзецьмі, а таму падаліся матулям яшчэ больш смачнымі. Ідэйным натхняльнікам і першым памочнікам нашых дзяцей у арганізацыі гэтага свята і ажыццяўленні ўсяго задуманага была іх класны кіраўнік Аксана Міхайлаўна Грыгор’ева, а правесці яго дапамаглі настаўнікі Іна Мікалаеўна Ляпко, Міхаіл Аляксандравіч Гурын і Анатоль Мікалаевіч Мядзведка. Мамы засталіся вельмі ўдзячнымі і шчаслівымі, дзеці — вясёлымі, а арганізатары — натхнёнымі на новыя цікавыя справы. Значыць, свята атрымалася.
Бацькі вучняў 7 “А” класа гімназіі
