З 18 сакавіка да работы на пасадзе старшыні Глускага раённага выканаўчага камітэта прыступіў Уладзімір Леанідавіч Царыкаў.

На гэту пасаду Уладзімір Царыкаў назначаны старшынёй Магілёўскага аблвыканкама Уладзімірам Даманеўскім па ўзгадненні з Прэзідэнтам краіны Аляксандрам Лукашэнкам. На гэтым тыдні была склікана нечарговая сесія Глускага раённага Савета дэпутатаў, на якой дэпутаты зацвердзілі Уладзіміра Царыкава на пасадзе старшыні раённага выканаўчага камітэта. На сесіі, акрамя дэпутатаў, прысутнічалі кіраўнікі прадпрыемстваў, устаноў, арганізацый раёна, аддзелаў райвыканкама, старшыня абласнога выканаўчага камітэта Уладзімір Даманеўскі і начальнік упраўлення арганізацыйна-кадравай работы аблвыканкама Генадзь Герасіменка.

Пасля таго як новы кіраўнік раёна быў зацверджаны дэпутатамі на пасадзе, губернатар уручыў яму пасведчанне старшыні Глускага райвыканкама.

Уладзімір Царыкаў нарадзіўся ў 1974 годзе ў вёсцы Драздоўка Горацкага раёна. Працоўную дзейнасць пачаў з 1991 года ў адной з гаспадарак Дрыбінскага раёна. Вышэйшую адукацыю па спецыяльнасцях “механізацыя сельскай гаспадаркі” і “эканоміка і кіраванне на прадпрыемстве” атрымаў у Беларускай дзяржаўнай сельскагаспадарчай акадэміі. З 2002 года працаваў у Кіраўскім раёне — галоўным інжынерам, затым першым намеснікам старшыні СВК “Рассвет” імя К. П. Арлоўскага, старшынёй СВК “Добасна-агра”. З красавіка 2014 года і да прызначэння старшынёй Глускага райвыканкама займаў пасаду першага намесніка старшыні Кіраўскага райвыканкама.

На думку губернатара, вопыт, набыты за час работы ў розных гаспадарках іншых раёнаў вобласці, неабходныя веды, навыкі і асабістыя дзелавыя якасці дапамогуць Уладзіміру Царыкаву справіцца з тымі задачамі, якія стаяць перад ім як перад кіраўніком раёна.

Уладзімір Царыкаў адзначыў, што разумее ўсю адказнасць, якая ўскладзена на яго з прызначэннем на пасаду старшыні Глускага райвыканкама, як разумее і тое, што ў кожным раёне людзі ад мясцовай улады чакаюць аднаго: магчымасці працаваць і зарабляць грошы, вучыцца, атрымліваць якасную медыцынскую і іншую дапамогу, адпачываць і жыць у бяспечным асяроддзі. На ўсё гэта ён як кіраўнік раёна і будзе прыкладаць свае намаганні, пры гэтым спадзяецца на дапамогу і падтрымку ўсёй мясцовай вертыкалі.

Юрый Дымша, які ўзначальваў Глускі раён з лістапада 2011 года, вызвалены ад пасады згодна з пададзенай заявай. Аднак яго веды і ўменні, як зазначыў губернатар Уладзімір Даманеўскі, будуць па-ранейшаму запатрабаваны ў раёне.

Таццяна ЛУКАШЭВІЧ

Фота Сяргея РУДЗІНСКАГА