Да Свята працы
Набліжаецца свята Першамая. Засталіся ў мінулым дэманстрацыі і мітынгі працоўных, але традыцыя адзначаць гэты дзень радасна, весела, дружна прадаўжаецца і зараз. У Глускім раёне зацверджаны план мерапрыемстваў, прысвечаных Святу працы. Так, яшчэ за некалькі дзён да 1 мая ў сельскіх бібліятэках, раённым Доме культуры, Заеліцкім доме рамёстваў будуць наладжаны выставы кніг і работ гурткоўцаў. Непасрэдна ў дзень свята, 1 мая, мясцовыя культработнікі і самадзейныя артысты запрашаюць аматараў песні ў кінатэатр “Арыён” на канцэрт “Квітнеючы месяц май”, пачатак у 12:00. У гэты ж дзень на стадыёне адбудзецца турнір па футболе сярод дзяцей і падлеткаў “Скураны мяч”. Спартыўныя спаборніцтвы сярод дарослых — першынство раёна па стральбе сярод каманд фізічнай культуры — намечаны на 30 красавіка, і пройдуць яны на базе ФСК. На бульвары Грахоўскага 1 мая будзе працаваць гандлёвы кірмаш, з 10:00 да 14:00.
Правядзенне святочных тэматычных мерапрыемстваў да 1 Мая запланавана і ў сельскіх установах культуры клубнага тыпу. У пятніцу ў РДК будуць наладжаны танцавальныя вечары для падлеткаў і моладзі.