Прэзідэнт Беларусі Аляксандр Лукашэнка падтрымаў прапанову ўнесці ў школьную праграму наведванне значных мясцін Беларусі. Аб гэтым беларускі лідар заявіў 22 мая, выступаючы на з’ездзе Федэрацыі прафсаюзаў Беларусі.
Аляксандр Лукашэнка адзначыў, што Федэрацыя прафсаюзаў і Міністэрства адукацыі ўнеслі добрую прапанову ўключыць у школьную праграму абавязковае наведванне значных мясцін Беларусі. «Гэтым трэба займацца, гэта частка патрыятычнага выхавання», — падкрэсліў Прэзідэнт. Ён нагадаў, што такі вопыт быў у Савецкім Саюзе, аднак цяпер яго пачалі забываць. Кіраўнік дзяржавы прапанаваў арганізоўваць паездкі ў тым ліку ў шосты школьны дзень — суботу.
Беларускі лідар таксама запатрабаваў захаваць сацыяльныя аб’екты, замацаваныя за прадпрыемствамі. «Прадпрыемствы не павінны скідваць сацыяльныя аб’екты і сацыяльную сферу. Гэта мой прынцып. Нармальны кіраўнік ніколі ні санаторый, ні спартыўны аб’ект нікуды перадаваць не будзе», — сказаў Аляксандр Лукашэнка.
