Развіццё малога і сярэдняга бізнесу пасадзейнічае вырашэнню праблемы занятасці ў рэгіёнах. Такое меркаванне выказаў 27 мая журналістам старшыня Савета Рэспублікі Міхаіл Мясніковіч у час выязнога пасяджэння Прэзідыума Савета Рэспублікі.
«Пытанні няпоўнай занятасці і беспрацоўя ў Брэсцкай вобласці вельмі актуальныя. Новыя рабочыя месцы ў вобласці і ў цэлым па краіне ў першую чаргу трэба ствараць у малым і сярэднім бізнесе. Для гэтага ёсць усе магчымасці, але выканкамы павінны ствараць больш камфортных умоў для развіцця прадпрымальніцтва. Гэта можна рэгуляваць праз сістэму мясцовых падаткаў, падтрымку інвестыцыйных дагавораў», — лічыць Міхаіл Мясніковіч.
На яго думку, асобныя рэгіёны і дзяржорганы не павінны штучна стрымліваць інвестыцыйную дзейнасць з-за неабходнасці стабілізаваць фінансавы рынак. «Пагоня за фінансавай стабілізацыяй можа прывесці да глыбокай стагнацыі ў рэальным сектары эканомікі, і мы можам значна адстаць у выпуску канкурэнтаздольнай прадукцыі», — перакананы старшыня Савета Рэспублікі.
Міхаіл Мясніковіч звярнуў увагу, што ў вырашэнні гэтых пытанняў таксама павінны прымаць актыўны ўдзел мясцовыя Саветы дэпутатаў.
