Урок памяці, тэматычная выстава кніг, літаратурна-паэтычная гадзіна — такія мерапрыемствы запланаваны на дзень сённяшні ў цэнтральнай бібліятэцы ў рамках святкавання 70-й гадавіны Перамогі савецкага народа ў Вялікай Айчыннай вайне. У раённым Доме культуры таксама на сёння запланаваны святочны агеньчык для ўдзельнікаў аматарскага аб’яднання “Мае гады — маё багацце”. Традыцыйна 8 мая праходзяць ускладанні вянкоў і кветак да воінскіх пахаванняў на могілках, памятнага знака воінам-інтэрнацыяналістам, на Алеі Славы ў Глуску, да помніка ахвярам Халакоста на Мыслачанскай гары, а таксама да ўсіх помнікаў, што знаходзяцца на тэрыторыях сельсаветаў.

Але асноўныя святочныя мерапрыемствы пройдуць непасрэдна 9 Мая. У 9:30 калоны спартсменаў, моладзі, працоўных збяруцца на плошчы, каб дружным шэсцем рушыць да мемарыяла “Воінская Слава”, дзе ў 10:00 пачнецца тэатралізаванае прадстаўленне “Успомнім усіх пайменна” — з ушанаваннем ветэранаў, са святочным канцэртам і ўскладаннем гірлянд і кветак да помніка Славы. Пасля гэтага месцам правядзення святочных мерапрыемстваў стане цэнтральны стадыён: з 10:00 да 16:00 тут будзе працаваць гандлёвы кірмаш; у 12:15 пачнецца канцэрт мастацкай самадзейнасці “Гэты Дзень Перамогі!”. Для дзяцей на летняй танцавальнай пляцоўцы клоўн і яго памочнікі з клуба выхаднога дня ў 12:30 нала-дзяць забаўляльна-гульнявую праграму, а ў кінатэатры “Арыён” у 15:00 пачнецца дэманстрацыя мастацкага фільма. Вечар святочнага дня таксама абяцае быць насычаным: на летняй танцавальнай пляцоўцы з 19:00 будзе тэматычная дыскатэка ад дыска-клуба “FLATCLUB”, а з 22:30 — дыскатэка ад дыска-клуба “Пазітыў”, яна прадоўжыцца да 02:00. Як заўсёды, насычанай будзе спартыўная праграма свята, усе мерапрыемствы якой, за выключэннем лёгкаатлетычнага прабегу, адбудуцца на цэнтральным стадыёне. Прабег жа стартуе ў 12:00 на цэнтральнай плошчы, а завершыцца каля помніка Воінскай Славы. На стадыёне ў 11:45 выступяць выхаванцы секцыі таэквандо, у 12:00 пачнуцца лёгкаатлетычныя эстафеты сярод вучняў гарадскіх школ, у 12:30 — турнір па міні-футболе сярод мужчынскіх каманд Глускага раёна, а ў 13:00 — спаборніцтва па валейболе. Таксама на стадыёне ў 12:30 адбу-дзецца традыцыйнае перацягванне каната, удзел у якім прымуць шэсць каманд — “Жылкамгаса”, АП-15, ДЛГУ “Глускі лясгас”, вузла электрасувязі, ПМК-249 і раёна электрасетак. Вечарам, у 17:00, пачнуцца спаборніцтвы па футболе сярод дзяцей і падлеткаў “Скураны мяч”, сустрэнуцца зборныя гімназіі і сярэдняй школы № 2. Гэта бу-дзе апошняя сустрэча ў серыі, на мінулым тыдні гульню ўжо правялі вучні першай і другой школ райцэнтра, а сёння, 8 мая, у 13:00 на стадыёне паспрачаюцца спартсмены першай школы і гімназіі.

Як бачым, праграма святочных дзён разлічана на любы ўзрост і на любы густ, так што, паважаныя чытачы, прыходзьце, весяліцеся, адпачывайце, а нагода для добрага настрою самая што ні на ёсць дастойная — Дзень Перамогі!