Савет Міністраў Беларусі зацвердзіў пералік рэгіянальных мерапрыемстваў па навядзенні парадку на зямлі. Аб гэтым сказана ў пастанове Саўміна нумар 428 ад 21 мая 2015 года «Аб некаторых пытаннях навядзення парадку на зямлі», апублікаванай 26 мая на Нацыянальным прававым партале.
Згодна з дакументам, зацверджаны тыпавы пералік рэгіянальных мерапрыемстваў па навядзенні парадку на зямлі і крытэрыі яго навядзення. У тыпавы пералік увайшлі такія пазіцыі, як добраўпарадкаванне і ўтрыманне тэрыторый населеных пунктаў, падтрыманне ў належным стане і добраўпарадкаванне сельскагаспадарчых тэрыторый і аб’ектаў, рэгуляванне распаўсюджвання і колькасці баршчэўніку Сасноўскага. Таксама ў лік рэгіянальных мерапрыемстваў увайшлі падтрыманне ў належным стане тэрыторый уздоўж аўтамабільных дарог і чыгунак, падтрыманне ў належным стане тэрыторый ляснога фонду, месц і зон адпачынку на водных аб’ектах, добраўпарадкаванне асабліва ахоўных прыродных тэрыторый.
Каардынацыю такой работы павінны ажыццяўляць мясцовыя выканаўчыя і распарадчыя органы, у абавязкі якіх уваходзіць штогод уключаць у рэгіянальныя праграмы па пытаннях добраўпарадкавання адпаведнай тэрыторыі мерапрыемствы па навядзенні парадку на зямлі ў адпаведнасці з тыпавым пералікам і вызначаць адказных выканаўцаў. Акрамя таго, яны павінны забяспечваць кантроль за выкананнем гэтых мерапрыемстваў, а таксама штомесяц інфармаваць насельніцтва праз СМІ аб выніках сваёй работы па навядзенні парадку.
У дакуменце таксама вызначана, што аблвыканкамы і Мінскі гарвыканкам штогод да 15 лютага павінны ўстанаўліваць паказчыкі навядзення парадку на зямлі на чарговы год на тэрыторыях адпаведных абласцей, раёнаў, гарадоў. У сваю чаргу райвыканкамы, гарвыканкамы (акрамя Мінскага гарадскога), адміністрацыі раёнаў у гарадах да 1 сакавіка на падставе гэтых паказчыкаў зацвярджаюць планы мерапрыемстваў на чарговы год.
Старшыні аблвыканкамаў і Мінскага гарвыканкама, кіраўнікі рэспубліканскіх органаў дзяржаўнага кіравання нясуць персанальную адказнасць за арганізацыю работы па навядзенні парадку на зямлі ў межах сваёй кампетэнцыі.
Гэта пастанова ўступае ў сілу пасля яе афіцыйнага апублікавання.
