Далёка не кожная арганізацыя і не кожнае аб’яднанне маюць свой гімн, а вось у кааператараў ён ёсць — гімн спажывецкай кааперацыі. І менавіта гімнам, па традыцыі, пачаўся ў Глуску ўрачысты сход, прысвечаны Дню кааперацыі. Гэта свята адзначаецца ў першую суботу ліпеня, а прыгожае святочнае мерапрыемства, падрыхтаванае работнікамі культуры, праходзіла напярэдадні гэтай даты, 2 ліпеня, у кінатэатры “Арыён”. Як зазначыў старшыня праўлення Глускага райпо Сяргей Зубчонак, у няпростых умовах мясцовым кааператарам даводзіцца весці фінансава-гаспадарчую дзейнасць, але са сваёй задачай яны спраўляюцца дастойна. Так, за пяць месяцаў гэтага года ўсе галіны райпо спрацавалі рэнтабельна, насельніцтву раёна ў мінулым годзе за здаваемую прадукцыю было выплачана 9 мільярдаў 600 мільёнаў рублёў. Поспехі кааперацыі залежаць найперш ад кадраў, вопытных і граматных спецыялістаў, працаўнікоў прылаўка, нарыхтоўшчыкаў, вадзіцеляў, будаўнікоў, рабочых прамысловага ўчастка. Гэта падкрэслілі ў сваіх выступленнях і ганаровыя госці свята — старшыня раённага Савета дэпутатаў Андрэй Баброўнік і начальнік кантрольна-рэвізійнага ўпраўлення Магілёўскага аблспажыўсаюза Лідзія Кавалькова, а сярод кааператараў, узнагароджаных з нагоды свята, былі прадстаўнікі ўсіх галін і відаў дзейнасці. Так, Ганаровай граматы Глускага раённага выканаўчага камітэта за шматгадовую і добрасумленную працу і значны ўклад у развіццё спажывецкай кааперацыі раёна была ўдастоена Людміла Валёха, прадавец з выкананнем абавязкаў загадчыка магазіна “Юбілейны”. Ганаровую грамату і прэмію аблспажыўсаюза за прафесіяналізм і асабісты ўклад у работу галіны атрымала Ала Хацько, прадавец з выкананнем абавязкаў загадчыка магазіна № 99 “Родны кут”, падзякі і грашовай прэміі аблспажыўсаюза ўдастоена праца вадзіцеля Пятра Галаўнёва. Ганаровымі граматамі праўлення і прафсаюзнага камітэта Глускага райпо, а таксама грашовымі прэміямі за шматгадовую добрасумленную працу адзначаны: прадавец з выкананнем абавязкаў загадчыка магазіна № 3 “Родны кут” Дзіна Ганчарова, начальнік гандлёвага аддзела Аксана Круглова, таваразнавец Марына Буян, рабочы па абслугоўванні будынкаў Георгій Нікіцін, вядучы бухгалтар Алена Бялько, выконваючая абавязкі галоўнага бухгалтара Лілія Сысой, інжынер-механік Уладзімір Багук, прадавец аўтамагазіна Ганна Карабанькова, фармаўшчык цеста ўчастка хлебапячэння Валянціна Чацвяргова і прадавец аўтамагазіна Вольга Жынько. Падзякі праўлення і прафсаюзнага камітэта і грашовыя прэміі таксама атрымалі: вядучы эканаміст Галіна Цярэшчанка, намеснік галоўнага бухгалтара Святлана Карабейнікава, бухгалтар Таццяна Патапенка, пекар участка хлебапячэння Кацярына Брэус, укладчык-упакоўшчык цэха замарозкі Наталля Грамыка, прадавец з выкананнем абавязкаў загадчыка магазіна “Начны” Ірына Галавачова, буфетчык бутэрброднай аграгарадка Катка Наталля Грабко, таваразнавец Вольга Мельнік, прадавец з выкананнем абавязкаў загадчыка магазіна “Глушчанка” Алена Дайнека і прадавец магазіна вёскі Слаўкавічы Ларыса Кульчыцкая.

Заўсёды асабліва прыемна, калі дасягненні нашых работнікаў і цэлых калектываў заўважаюць і адзначаюць на абласным і рэспубліканскім узроўнях. Так, дыпломам упраўлення гандлю і паслуг Магілёўскага аблвыканкама ў намінацыі “Лепшы магазін спажывецкай кааперацыі з гандлёвай плошчай да 500 квадратных метраў” узнагароджаны магазін Глускага райпо № 99 “Родны кут”, прадавец з выкананнем абавязкаў загадчыка Ала Хацько. Згодна з пастановай Белкаапсаюза № 72 ад 15 чэрвеня 2015 года аб прысваенні звання “Чалавек года” па выніках работы за 2014 год званне “Лепшы юрыст” прысвоена юрысконсульту Глускага райпо Але Ільюшчэні, з уручэннем дыплома і грашовай прэміі. Ёсць у сістэме спажывецкай кааперацыі раёна і тыя, хто сваёй стараннай і шматгадовай працай заслужыў таго, каб звацца “заслужаным ветэранам працы калектыву”, гэта буфетчык бутэрброднай аграгарадка Засценак Усцярхі Таццяна Кавалевіч, намеснік старшыні па нарыхтоўках і прамысловасці Ганна Янушэўская і прадавец з выкананнем абавязкаў загадчыка магазіна “Начны” Ірына Галавачова. Падзячны ліст і прэмія за шматгадовую добрасумленную працу і ў сувязі з 55-годдзем былі ўручаны прадаўцу Галіне Рубін.

Але на гэтым віншаванні глускім кааператарам не скончыліся: святочную цырымонію прадоўжылі іх дзелавыя партнёры, тыя, з кім наладжана цеснае фінансавае і гандлёвае супрацоўніцтва. Гэта найперш мясцовыя прадпрыемствы — Глускі філіял вытворчага ўнітарнага прадпрыемства “Малочны полюс”, у асобе яго дырэктара Пятра Сыцькі, і ЦБП № 707 філіяла № 703 ААТ “Беларусбанк”, у асобе яго дырэктара Надзеі Хмыловай. Падарункі з нагоды свята былі таксама ўручаны ад Бабруйскага мясакамбіната і піваварнай кампаніі “Хайнекен”.

Што не па сілах аднаму чалавеку, лёгка вырашыць і зрабіць агульнымі намаганнямі, менавіта гэта ідэя некалі і падштурхнула людзей аб’яднацца і стварыць кааперацыю. І сёння ў нашым раёне спажывецкая кааперацыя — гэта вялікі, адзіны і зладжаны механізм. Ён трымаецца працай прадаўцоў, вадзіцеляў, хлебапёкаў, павароў, кандытараў, работнікаў і спецыялістаў усіх галін раённага спажывецкага таварыства. Так заўсёды было і павінна застацца.

Т. ЛУКАШЭВІЧ

Фота І. ГРАМЫКІ