Горача гэтымі жнівеньскімі днямі не толькі ад сонечнай спёкі, але і ад спартыўнага запалу, што разгараецца на мясцовым стадыёне. Днямі тут завяршылася першынство раёна па міні-футболе паміж камандамі фізічнай культуры прадпрыемстваў і арганізацый Глуска. Праводзіліся спаборніцтвы ў два кругі, а іх вынікі пайшлі ў залік раённай спартакіяды. Безумоўным пераможцам па набраных балах стала каманда УКП “Жылкамгас”. Прэтэндэнты на другое і трэцяе месцы ў сваім актыве мелі аднолькавую колькасць балаў, таму ўсё вызначыла розніца забітых і прапушчаных галоў: другое месца заняла каманда раённага аддзела ўнутраных спраў, на трэцім месцы аддзел па надзвычайных сітуацыях. У першынстве раёна па міні-футболе таксама прымалі ўдзел каманды раённага спажывецкага таварыства, лясгаса і АП-15. Падчас закрыцця спаборніцтваў Кубак і дыпломы адпаведных ступеняў ад аддзела адукацыі, спорту і турызму прызёрам уручыў начальнік аддзела Аляксандр Бельскі.
Т. ЛУКАШЭВІЧ
