У падарожжа па краіне ведаў
Школу часта параўноўваюць з караблём, а вучобу — з падарожжам па краіне Ведаў, з дарогай адкрыццяў, новых знаёмстваў і сустрэч. Каб зразумець, што дае чалавеку школа, як яна ўплывае і мяняе яго, дастаткова пабываць на лінейцы Першага званка. Пабываць і паглядзець на такіх маленькіх і такіх нясмелых першакласнікаў, а потым — на выпускнікоў, высокіх, прыгожых, пасталелых, амаль што дарослых. Гэты погляд, гэта параўнанне скажуць вам усё і будуць самым важкім аргументам за тое, што школа — важны этап у нашым жыцці, а пачатак вучобы — знакавая падзея. Прычым не толькі для самога школьніка, а і для ўсёй сям’і, горада, раёна, дзяржавы.
Святам раённага маштабу стаў на Глушчыне Дзень ведаў: 1 верасня ва ўсіх дзіцячых навучальных установах пабывалі прадстаўнікі мясцовай выканаўчай і заканадаўчай улады, шэфы навучальных устаноў. Старшыня райвыканкама Уладзімір Царыкаў прысутнічаў на лінейцы Першага званка ў гімназіі. Ён прывітаў настаўнікаў, бацькоў і вучняў, пажадаў добрай вучобы і моцнага здароўя, а для падняцця настрою, для ўмацавання матэрыяльнай базы гэтай установы ад райвыканкама падарыў тэлевізар, 38 самых маленькіх гімназістаў-перша-класнікаў з рук кіраўніка раёна атрымалі персанальныя падарункі — кнігі.
Зрэшты, падарункаў для гімназістаў было шмат: ад СВК “Дружба” — манітор, ад УКП “Жылкамгас” — дыван (а летам яшчэ і з рамонтам дапамаглі), ад райпо — прынтар (за актыўную нарыхтоўку другаснай сыравіны), а капітаны футбольных каманд з рук дырэктара гімназіі атрымалі торты. У сваім прывітальным слове Надзея Марус таксама падзякавала шэфам за іх дапамогу і падтрымку, усім вучням, што працавалі летам, а бацькам, якія найбольш актыўна ўдзельнічалі ў рамонце, уручыла падзякі. Цікавым, шчырым, пранікнёным было выступленне Алены Дзяшчэні (ад імя бацькоў), а музычныя нумары і салют у гонар першакласнікаў стварылі па-сапраўднаму святочны настрой.
Запомніцца Дзень ведаў і 21 першакласніку са школы № 2, з Днём ведаў іх і ўсіх вучняў школы павіншавала намеснік старшыні райвыканкама Людміла Клыга, тром школьнікам за поспехі ў вучобе і спорце былі ўручаны грашовыя прэміі, іх атрымалі Павел Марціновіч, Марына Кавалёва і Паліна Селівашчанка. Райпо за першае месца па зборы макулатуры падарыла школе лічбавы фотаапарат, ПМК-249 і ПМК-86 летам дапамаглі з рамонтам, а зараз школьных футбалістаў прэміравалі вялікімі тортамі. Правільна арганізаваны вольны час — лепшая прафілактыка правапарушэнняў, вырашылі ў раённым аддзеле ўнутраных спраў і падарылі сваёй падшэфнай установе футбольны і валейбольны мячы. Персанальны падарунак, буцы, дастаўся аднаму з лепшых футбалістаў школы Дзмітрыю Асташаву, яму, а таксама Вадзіму Прыбышу начальнік РАУС Ігар Качалаў уручыў падзячныя лісты — за актыўны ўдзел (на правах падшэфных) у спартакіядзе кіруючага складу органаў унутраных спраў, якая праходзіла ў Крычаве.
Самы вялікі атрад першакласнікаў, 63 хлопчыкі і дзяўчынкі, папоўніў сяголета вучнёўскі калектыў сярэдняй школы № 1 імя Сяргея Грахоўскага. Яе настаўнікаў, школьнікаў і іх бацькоў прывітаў старшыня раённага Савета дэпутатаў Андрэй Баброўнік. Цёплыя віншавальныя словы ад усяго працоўнага калектыву сказаў на лінейцы дырэктар аўтапарка № 15 Аляксандр Сыцька (школа ўдзячна сваім шэфам і за дапамогу ў рамонце, і за цікавую турыстычную паездку ў Брэст), раённае спажывецкае таварыства адзначыла вучнёўскую актыўнасць у зборы макулатуры мікрахвалевай печкай. А вось тром класам першакласнікаў з усіх падарункаў найбольш спадабаліся падарункі ад Прэзідэнта нашай краіны Аляксандра Рыгоравіча Лукашэнкі, кніжкі пра нашу краіну — Рэспубліку Беларусь. Няма сумнення, што да канца вучэбнага года яны, як і іншыя школьнікі-шасцігодкі, самі змогуць іх прачытаць. Але гэта будзе пасля, а пакуль нашы першакласнікі стаяць на самым пачатку свайго школьнага жыцця. Няхай навука будзе ім у радасць і, вядома ж, на карысць.
Таццяна ЛУКАШЭВІЧ
Фота Сяргея РУДЗІНСКАГА
і Вольгі ЧУЧВАЛ