Традыцыйны конкурс чытальнікаў вершаў Сяргея Грахоўскага адбыўся ў Глускай сярэдняй школе № 1, што носіць імя пісьменніка. У дзень нараджэння паэта і празаіка, 25 верасня, у актавай зале школы сабралася больш за дваццаць канкурсантаў, вучняў з першага па адзінаццаты класы, прыйшлі ўдзельнікі груп падтрымкі, настаўнікі.
Канешне, у некага атрымлівалася чытаць вершы з артыстызмам, быццам разгортваючы перад слухачамі тэатральную пастаноўку, нехта імкнуўся да дасканаласці, але ад хвалявання не спраўляўся з інтанацыяй… Журы, а ў яго ўвайшлі дырэктар школы Валянціна Сыцька, педагог-арганізатар Аляксандра Дземідзенка і бібліятэкар Валянціна Марчук, улічвала ўсе нюансы, каб вызначыць пераможцаў. Цікава, што большасць дыпломаў 1-й ступені дасталася “пачаткоўцам” — першакласніцы Дашы Дзяшчэні, Алене Гааг (2-гі клас) і Дашы Урбанскай (3-ці клас), першыя месцы таксама ў васьмікласніцы Ані Анцюшэні і дзесяцікласніцы Карыны Арцёмчык. Абладальніцамі дыпломаў другой ступені сталі тры дзяўчынкі з розных узроставых груп — Даша Бахановіч з 3-га класа, Віка Барысік з 6-га і Яна Працэнка з 11-га. Дыплом трэцяй ступені атрымала шасцікласніца Даша Ерамеева.
А. ПЯТРОВА
