Хто не глядзеў перадачу “Наперад у мінулае” на канале “Беларусь 3”, паглядзіце абавязкова, і проста так, для павышэння настрою і культурнага ўзроўню, і таму, што ў бліжэйшым выпуску, у нядзелю, 11 кастрычніка, у 12:05, будзе сюжэт з удзелам нашых знакамітых зямлячак, “аўтэнтычных” бабулек з вёскі Дуброва.
Крыху больш за тыдзень таму да іх прыязджала здымачная група канала “Беларусь 3” і вядучая перадачы “Наперад у мінулае” Аксана Вечар. Як і прынята на гасціннай Глушчыне, сваіх гасцей, сталічных тэлевізіёншчыкаў, самадзейныя артысты сустрэлі хлебам-соллю, там жа, у Дуброўскім сельскім клубе, наладзілі невялікую выставу этнаграфічных экспанатаў (у гэтым актыўна дапамог загадчык тамтэйшай бібліятэкі Уладзімір Дзяшчэня), а таксама вышываных работ адной з удзельніц вакальнага гурта — Людмілы Іванаўны Пракопчык. Але галоўным, зразумела, было выкананне народных песень. А іх нашы спявачкі ведаюць вялікую колькасць, з імі выступалі на розных сцэнічных пляцоўках, нават у канцэртнай зале “Мінск” і ў сталічнай філармоніі. Таму ці дзіўна, што і зараз сваёю творчасцю выклікалі цікавасць у стваральнікаў такой арыгінальнай музычнай перадачы, як “Наперад у мінулае”. Думаецца, няма патрэбы зараз расказваць, як праходзілі здымкі ў Дуброве (паглядзім саму перадачу ў нядзелю), лепш назваць імёны спявачак, гэтых сціплых захавальніц нашай з вамі народнай песеннай спадчыны. Гэта Людміла Іванаўна Пракопчык, Марыя Дарафееўна Пракопчык, Ніна Васільеўна Шчэрба, Ніна Іванаўна Сідаровіч, Марыя Прохараўна Шчэрба, Марыя Прохараўна Барысевіч, Вера Дарафееўна Балкіс, Вольга Гаўрылаўна Кашко, а кіруе гэтым вакальным гуртом загадчыца клуба Галіна Графава.
Т. ЛУГАВАЯ
Фота У. ДЗЯШЧЭНІ
