Наймальнікі ў Мінску прапануюць тры вакансіі з зарплатай больш як Br45 млн. Аб гэтым паведамілі ў камітэце па працы, занятасці і сацыяльнай абароне Мінгарвыканкама.
Самы высокі ўзровень аплаты працы для саіскальніка (Br69,8 млн) — у СТАА, якому патрэбны дырэктар з вопытам работы ў арганізацыях міжнародных плацежных сістэм з абарачэннем электронных грошай, які валодае ўкраінскай і англійскай мовамі.
Амаль Br50 млн прапануе сталічнае ТАА краўніку праекта. Прэтэндэнту на гэту пасаду неабходна мець вопыт работы больш за 12 гадоў, ведаць еўрапейскія стандарты будаўніцтва, валодаць англійскай, нямецкай, латышскай мовамі, а таксама асабістым аўто. Яшчэ адна высокааплатная вакансія (Br45,9 млн) — для генеральнага дырэктара, які валодае англійскай, французскай і італьянскай мовамі, з вопытам работы больш за 10 гадоў.
У Мінску банк вакансій (заяўкі падаюць прадпрыемствы, арганізацыі і ўстановы ў службу занятасці сталіцы) абнаўляецца штодзень. На 1 кастрычніка наймальнікамі было заяўлена 6,9 тыс. вакансій, з іх для рабочых — 4,2 тыс.
Сярэдні ўзровень аплаты па заяўленых вакансіях складае Br4,3 млн па прафесіях рабочых і Br4,9 млн — па пасадах служачых. Асноўная частка вакансій (73 працэнты) — з заработнай платай ад Br3 млн да Br10 млн. Больш як 70 свабодных рабочых месц — з аплатай Br10 млн і больш.
З красавіка бягучага года попыт на кадры паступова зніжаўся. Пераважаюць вакасіі арганізацый аховы здароўя і прадастаўлення сацыяльных паслуг (19 працэнтаў), прамысловасці і будаўніцтва (па 15 працэнтаў), гандлю (13 працэнтаў), сферы нерухомай маёмасці (11 працэнтаў), адукацыі (10 працэнтаў).
На 1 кастрычніка на кожнага зарэгістраванага беспрацоўнага сталіцы прыпадала 1,1 свабоднае рабочае месца (год таму — 11).
Па шэрагу прафесій колькасць вакансій па-ранейшаму перасягае колькасць беспрацоўных (арматуршчык, бетоншчык, муляр, маляр, тынкоўшчык, слесар-сантэхнік, слесар механазборачных работ, повар, прадавец, кантралёр-касір, санітар, прыбіральшчык памяшчанняў і інш.). Патрабуюцца таксама ўрачы (296 вакансій), медыцынскія сёстры (554), інжынеры (264) і інш.
Пры гэтым прэтэндэнтаў больш, чым заяўленых вакансій, па такіх прафесіях, як вадзіцель аўтамабіля, сталяр, слесар-рамонтнік, кладаўшчык, падсобны рабочы, рабочы зялёнага будаўніцтва, грузчык, дворнік, рабочы па комплексным прыбіранні і ўтрыманні домаўладанняў, прыбіральшчык тэрыторый, вартаўнік і інш. У вялікай колькасці таксама бухгалтары, эканамісты.
